መዝሙር 116

116 ¹አባቴን እወድደዋለሁ፤ ድምፄንና የምሕረት ጥሪዬን ይሰማልና። ²ጆሮውን ወደ እኔ ስላዘነበለ፣ በሕይወት እስካለሁ ድረስ እጠራዋለሁ። ³የሞት ገመዶች ተጠመጠሙብኝ፤ የመቃብር ጭንቀት ያዘኝ፤ በመከራና በሐዘን ተዋጥሁ። ⁴ከዚያም የአባቴን ስም ጠራሁ፤ “አባት ሆይ፣ እለምንሃለሁ፣ ነፍሴን አድን!” ⁵አባታችን ጸጋ ያለው ነው፣ ጻድቅም ነው፤ አባታችን ርኅራኄ የተሞላ ነው። ⁶አባቴ የዋሃንን ይጠብቃል፤ በተዋረድሁ ጊዜ አዳነኝ። ⁷ነፍሴ ሆይ፣ ወደ ዕረፍትሽ ተመለሽ፤ አባቴ በጎ አድርጎልሻልና። ⁸ነፍሴን ከሞት፣ ዐይኖቼን ከእንባ፣ እግሮቼን ከመሰናከል አድነሃልና። ⁹በሕያዋን ምድር በአባቴ ፊት እመላለሳለሁ። ¹⁰አመንሁ፤ “እጅግ ተጨንቄአለሁ” ባልሁ ጊዜም እንኳ፤ ¹¹በደንጋጤዬ፣ “ሰው ሁሉ ውሸታም ነው” አልሁ። ¹²ስለ መልካምነቱ ሁሉ ለአባቴ ምን እመልስለታለሁ? ¹³የድነትን ጽዋ አነሣለሁ፤ የአባቴንም ስም እጠራለሁ። ¹⁴ለአባቴ የተሳልሁትን ስእለት በሕዝቡ ሁሉ ፊት እፈጽማለሁ። ¹⁵የታማኞቹ ሞት ለአባቴ ክቡር ነው። ¹⁶አባት ሆይ፣ በእውነት እኔ ባሪያህ ነኝ፤ እኔ ባሪያህ፣ የገረድህ ልጅ ነኝ። ሰንሰለቶቼን ፈትተሃል። ¹⁷የምስጋናን መሥዋዕት አቀርብልሃለሁ፤ የአባቴንም ስም እጠራለሁ። ¹⁸ለአባቴ የተሳልሁትን ስእለት በሕዝቡ ሁሉ ፊት እፈጽማለሁ፤ ¹⁹በአባቴ ቤት አደባባዮች ውስጥ፣ ኢየሩሳሌም ሆይ፣ በመካከልሽ። ሃሌ ሉያ!