Maanna Ating Bakana Kanei Thang Rwe
Kan thang theinu manpa khat na Bapa khou swankanu. Maanna akhwan ngaisunu kaan bi thinu om senrui na kazwan ngaake, atibriakpina maan ring ongnu khwa seiga kou lang deta nge. Eina pa-aam han pi ngam dingbo diga ngai nge, khatle ringriak om ngai kai basaangnu khatle mi nun meithaan bi hweininu pumnu takka katak nge.
116 1Eina Apa ding kriang nge, balangbe Maanna akhwan khatle phaangkriang lang aom pao bing ding ngaisu nge. 2Balangbe Maanna Bakanaa ating kanei thang briakpina, ei ring ongnu khwa seiga Bameng ding koulune. 3Thinu om senrui na ating kazwan rwe; kathi ram om sung naanu na ating namsu rwe; riangrenu khatle sung riangrenuna ei ding pi ngam rwe. 4Habei ga eina Apa meng ding kou rwe, “He Apa, eina Nakhou hweinuwe, akatha ding kan thang ngo!” 5Ani Pa ga phaangkriang amnu khatle ririaknuwe; ani Pa ga kriangnuna sipe. 6Apa na ningting maknu mi nun ding barak theiye; ei bangiamta thangnu kaan bi, Maanna ating kan thang rwe. 7Akatha, nang om basaknu bi han hung latro, balangbe Apa na nakhou taswang khak kasanu to rwe. 8Balangbe Nangna thinu khouna akatha ding, mikthi khouna amik ding, ket basui khouna aket ding kan thang rwe. 9Eina ringnu rwan talei ram bi Apa om meithaan bi se onglune. 10Eina balumsa rwe; atiyeda eina rinne, “Ei taswang khak riangre khaang nge.” 11Ei kachinu kaan bi eina rinne, “Mi bingza chong karwaknu gaye.” 12Maanna akhou to thangnu kasanu bing lang, eina Apa khou pa-aam han pi ngam dingbo? 13Eina ringriak om ngai ding kai basaangga Apa meng ding koulune. 14Eina Bami nun bing meithaan bi, Apa khou eina karen thang damnu bing ding pi hung tanglune. 15Baom balumsa lang khopnu bing om thinu ga Apa khou baman kungnuwe. 16He Apa, ei batak sekka Nachwantok mi gaye; ei Nachwantok mi, nang om tamei chwantok mi om sa gaye. Nangna ei chai bing ding sut thang rwe. 17Eina Nakhou swanka om rikhaang pot katluga Apa meng ding koulune. 18Eina Bami nun bing meithaan bi, Apa khou eina karen thang damnu bing ding pi hung tanglune, 19Apa om in inkhaan bi, Jerusalem nani lak pi haga pi hung tanglune. Halleluiya!