AMahubo 116

116 ¹Ngiyamthanda uBaba wami, ngokuba uyalizwa izwi lami, ukukhala kwami ngicela isihawu. ²Ngokuba wabeka indlebe yakhe kimi, ngiyakubiza kuye zonke izinsuku zokuphila kwami. ³Izintambo zokufa zangithandela; ubuhlungu bethuna bangibamba; ngehlelwa usizi nokudabuka. ⁴Ngase ngibiza egameni likaBaba wami, ngathi: “Awu Baba wami, ngiyakunxusa, khulula umphefumulo wami!” ⁵Unomusa uBaba wethu, ulungile; uBaba wethu ugcwele isihawu. ⁶UBaba wami ulondoloza abangenalwazi; lapho ngehliselwa phansi, wangisindisa. ⁷Buyela, mphefumulo wami, ekuphumuleni kwakho, ngokuba uBaba wami ube muhle kangaka kuwe. ⁸Ngokuba ukhulule umphefumulo wami ekufeni, amehlo ami ezinyembezini, izinyawo zami ekukhubekeni. ⁹Ngiyakuhamba phambi kukaBaba wami ezweni labaphilayo. ¹⁰Ngakholwa, nalapho ngithi: “Ngihlushwa kakhulu”; ¹¹ekwethukeni kwami ngathi: “Wonke umuntu ungumqambimanga.” ¹²Ngiyakubuyiselani kuBaba wami ngabo bonke ubuhle bakhe kimi? ¹³Ngiyakuphakamisa indebe yensindiso, ngibize egameni likaBaba wami. ¹⁴Ngiyakugcwalisa izifungo zami kuBaba wami phambi kwabantu bakhe bonke. ¹⁵Kuyigugu kuBaba wami ukufa kwabathembekile bakhe. ¹⁶Awu Baba wami, ngiyinceku yakho ngempela; ngiyinceku yakho, indodana yencekukazi yakho. Uqaqile izibopho zami. ¹⁷Ngiyakunikela kuwe umhlatshelo wokubonga, ngibize egameni likaBaba wami. ¹⁸Ngiyakugcwalisa izifungo zami kuBaba wami phambi kwabantu bakhe bonke, ¹⁹emagcekeni endlu kaBaba wami, phakathi kwakho, Jerusalema. Haleluya!