Ana Iwuishong Nāshungmi
Kharing kahai mi akhana awui Avāli ningkashi khami. Ana ngakaowa tharan sikhawui ruiyongna ali tāngda khuikahai, kala Avāna ngahānkāmi, chieina ana kharing leihaorā ngakaorā da mangashit. Ana khi kasāra da ngahāngāk, kala khayonchao akha zangdoka kala mayarkada khangashit mikashap eina ngahānkāmi.
116 1Ina iwui Avāli leishi, khikhalajila ana iwui akhon, iwui kapowui khavaokhon shāmi. 2Khikhalajila ana iwuishong nāshungda, iwui kharing atam katongali ina ali ngakaora. 3Kathiwui khara̱na ili kuimareiphinhaowa; Kathewui ramwui kakhanangna ili pemhaowa; sipkasā kala wukkakhanang china ili yui ngasakhaira. 4Chieina ina iwui Avāwui mingli ngakaowa: "O iwui Avā, ina nali kapo, imanglā kanshokmilu!" 5Ithumwui Avā lumashankatha̱a, kala khamashungana; ithumwui Avā lukhamashanna pemtinghai. 6Iwui Avāna ningkashambingli mayona; I ngazanlakha, ana ili huimi. 7Ngareiunglu, O imanglā, nawui ngasāmkakhuili, kaja iwui Avāna nali mavātlakla sāmihaira. 8Kaja nana imanglā kathiwui eina, imik chāra̱wui eina, kala iphei kongluiwui eina khāngshokmihaira. 9Ina iwui Avāwui mangāli kharingabingwui ngaleili zatra. 10"I hakmahālak eina khananghaira" da ina hānglakha tangdala, ina shitsanghaira; 11I ngacheelaka eina, ina hi da hānga, "Mi kachiva̱ kakapika." 12Iwui Avāna ili sāmi kaphā saikorawui vang, ina awuili khi runra̱khala? 13Ina huikhamiwui tengkot khāngkāra, kala iwui Avāwui mingli ngakaora. 14Iwui Avāli iwui tuingashit ina awui mi saikorawui mangāli ungshung ngasakra. 15Awui shitkasangabingwui kathi chi iwui Avāwui mangāli aman kasakna. 16O iwui Avā, kachangkhat eina I naraona; I naraona, narao sha̱naowui naomayarana. Nana iwui khara̱ sāshatmihaira. 17Ina nali ningkashiwui pha̱kaphayā chigatra, kala iwui Avāwui mingli ngakaora. 18Awui mibing saikorawui mangāli, iwui Avāli iwui khangashit sāra, 19Iwui Avāwui shimwui kayāngli, O Jerusalem, nawui alungli ina sāra. Proholi solu!
