Tekhamatei Nawuina
‘Athumwui Vare khinungli lei?’ da khangamasang chiwui khangahān, laana tākpāngda yanga. Meoma̱wui mor, mik kala na lei kha khikhala masāmana, kala kasābingla athumna sākahai thada kathi sāhaora. Mi kathum — Israel, Aaronwui shimkhur, ali ngacheekhangai saikora — ithumwui Avāli ngashiktitlu da hāngmi.
115 1Ithumli maningmana, O ithumwui Avā, ithumli maningmana, kha nawui makhangachei leikashi, nawui ningkatongwui vang, nawui mingli tekhamatei ngasaklu.
2Khisāda yurbingna hāngkhala, "Athumwui Vare ara kali leikhala?" 3Ithumwui Avā chi kazingramli lei; ana awui sākhangangai sāra. 4Athumwui meoma̱ chi lupāsā eina sinana, mipāng eina sākakhuina. 5Athum khamor kai, kha mamatuipaimana; amik kai, kha matheirarmana; 6Athum khanā kai, kha mashāmana; anganam kai, kha makhanganama; 7Athum pāng kai, kha makhanangrarmana; phei kai, kha mazatrarmana; lah athumwui kharok eina akhon mashokmana. 8Meoma̱ sākakhuibing chi athum thāda ngasāra, kala athumli shitkasang mi kachiva̱la chithāda ngasāra.
9O Israel, ithumwui Avāli shitsanglu! Ana athumwui khangachon kala chāngveina. 10Aaronwui shimkhur, ithumwui Avāli shitsanglu! Ana athumwui khangachon kala chāngveina. 11Ithumwui Avāli khangacheebing, ali shitsanglu! Ana athumwui khangachon kala chāngveina.
12Ithumwui Avāna ithumli phaningunga; ana ithumli somira; ana Israelwui shimkhurli somira; Aaronwui shimkhurli somira; 13Ana ithumwui Avāli khangacheebing, khangazanabingla kharebingla, somira.
14Ithumwui Avāna nathumli, nathum kala nathumwui naongarābing, mataisangda kharkhangasakranu. 15Kazing eina ngalei kasaa ithumwui Avāna nathumli somiranu.
16Kazingram chi ithumwui Avāwui kazingramna, kha okathuili ana miwui naomayara ngarāli mihaira. 17Kathebing chi ithumwui Avāli masochikatmana, lah kasaikhali tunglaga khalei khipākhala masochikatmana. 18Kha arui eina thuida katang mavaila ithumna ithumwui Avāli sochikatra. Proholi solu!
