Saamu 115

115 ¹Kì í ṣe fún wa, Baba wa, kì í ṣe fún wa, bí kò ṣe fún orúkọ rẹ ni kí a fi ògo fún, nítorí ìfẹ́ rẹ tí kì í yẹ̀ àti òtítọ́ rẹ.

²Èéṣe tí àwọn orílẹ̀-èdè yóò fi wí pé, “Níbo ni Ọlọ́run wọn wà nísinsìnyí?” ³Baba wa ń bẹ ní ọ̀run; ó ń ṣe ohunkóhun tí ó bá wù ú. ⁴Òrìṣà wọn jẹ́ fàdákà àti wúrà, iṣẹ́ ọwọ́ ènìyàn. ⁵Wọ́n ní ẹnu, ṣùgbọ́n wọn kò lè fọhùn; ojú, ṣùgbọ́n wọn kò lè ríran; ⁶wọ́n ní etí, ṣùgbọ́n wọn kò lè gbọ́rọ̀; imú, ṣùgbọ́n wọn kò lè gbóòórùn; ⁷wọ́n ní ọwọ́, ṣùgbọ́n wọn kò lè fọwọ́ kan nǹkan; ẹsẹ̀, ṣùgbọ́n wọn kò lè rìn; bẹ́ẹ̀ ni ohùn kan kì í ti ọ̀fun wọn jáde. ⁸Àwọn tí ó ṣe wọ́n yóò dàbí wọn, bẹ́ẹ̀ sì ni gbogbo ẹni tí ó gbẹ́kẹ̀lé wọn.

⁹Israẹli, gbẹ́kẹ̀lé Baba wa! Òun ni olùrànlọ́wọ́ wọn àti asà wọn. ¹⁰Ilé Aaroni, gbẹ́kẹ̀lé Baba wa! Òun ni olùrànlọ́wọ́ wọn àti asà wọn. ¹¹Ẹ̀yin tí ẹ bẹ̀rù Baba wa, gbẹ́kẹ̀lé e! Òun ni olùrànlọ́wọ́ wọn àti asà wọn.

¹²Baba wa ti rántí wa; yóò bùkún wa. Yóò bùkún ilé Israẹli; yóò bùkún ilé Aaroni; ¹³yóò bùkún àwọn tí ó bẹ̀rù Baba wa, àti àwọn kékeré àti àwọn ńlá.

¹⁴Kí Baba wa mú kí ẹ̀yin pọ̀ sí i, ẹ̀yin àti àwọn ọmọ yín. ¹⁵Kí Baba wa bùkún yín, Ẹlẹ́dàá ọ̀run àti ayé.

¹⁶Ọ̀run ni ọ̀run Baba wa, ṣùgbọ́n ayé ni ó ti fi fún àwọn ọmọ ènìyàn. ¹⁷Àwọn òkú kì í yin Baba wa, bẹ́ẹ̀ ni kò sí ẹnikẹ́ni tí ó sọ̀kalẹ̀ lọ sínú ìdákẹ́rọ́rọ́. ¹⁸Ṣùgbọ́n àwa yóò bùkún Baba wa láti ìsinsìnyí lọ àti títí láéláé. Hálellúyà!