Mahima to Apuni laga ase
'Taikhan laga Isor kot te ase?' laga thatta te jawab di kene, gana tulona kore. Murti khan laga mukh, suku aru kan ase kintu kisu bhi nakore, aru taikhan ke bona manuh khan bhi nijor bona jinis nisena jibon-nathaka hoi jai. Tin dol ke amar Pitri uporte he biswas koribole koi: Israel, Aaron laga ghor, aru Tak bhoi kora sob manuh.
115 1Amikhan ke nohoi, amar Pitri, amikhan ke nohoi, kintu Apuni laga nam ke mahima dibi, Apuni laga vachan laga morom aru Apuni laga biswasi hua karne.
2Kele jati khan pora kobo, “Tarkhan laga Isor etiya kot te ase?” 3Amar Pitri sorgo khan te ase; Tar ki itcha ase, eitu sob Tar pora kore. 4Tarkhan laga murti khan chandi aru suna ase, manuh laga hath laga kaam ase. 5Tarkhan laga mukh ase, kintu kobo napare; suku ase, kintu sabo napare; 6tarkhan laga kaan ase, kintu hunibo napare; nak ase, kintu sungibo napare; 7tarkhan laga hath ase, kintu chubo napare; theng ase, kintu berabo napare; aru tarkhan laga gola pora eku awaj nabair. 8Kun khan pora eitu khan ke banai, taikhan eitu khan nisena hoi jai, aru kun pora eitu khan ke biswas kore, sob bhi tene hoi.
9Israel, amar Pitri ke biswas koribi! Tai tarkhan laga sahai aru tarkhan laga dhal ase. 10Aaron laga ghor manuh khan, amar Pitri ke biswas koribi! Tai tarkhan laga sahai aru tarkhan laga dhal ase. 11Tumikhan kun amar Pitri ke bhoi kore, Tar ke biswas koribi! Tai tarkhan laga sahai aru tarkhan laga dhal ase.
12Amar Pitri amikhan ke monte rakhise; Tai amikhan ke asirbad dibo. Tai Israel laga ghor ke asirbad dibo; Tai Aaron laga ghor ke asirbad dibo; 13Tai kun khan amar Pitri ke bhoi kore, taikhan ke asirbad dibo, chutu aru dangor duyo ke.
14Amar Pitri pora tumikhan ke aru bisi bisi barhai dibo, tumikhan aru tumikhan laga bacha khan ke. 15Sorgo aru prithibi bona amar Pitri pora tumikhan ke asirbad hobi.
16Sorgo khan to amar Pitri laga sorgo ase, kintu prithibi tu Tai manuh khan ke dise. 17Mora manuh khan amar Pitri ke stuti nakore, aru chup-chap te nami juwa kun bhi nakore. 18Kintu amikhan etiya pora aru hodai-hodai tak amar Pitri ke asirbad dibo. Hallelujah!