መዝሙር 115

115 ¹ለእኛ አይደለም፣ አባታችን ሆይ፣ ለእኛ አይደለም፤ ነገር ግን ስለ ኪዳንህ ፍቅርና ስለ ታማኝነትህ ክብሩን ለስምህ ስጥ።

²አሕዛብ፣ “አሁንስ አምላካቸው ወዴት አለ?” ለምን ይላሉ? ³አባታችን በሰማያት ነው፤ የወደደውን ሁሉ ያደርጋል። ⁴ጣዖቶቻቸው ብርና ወርቅ፣ የሰው እጅ ሥራ ናቸው። ⁵አፍ አላቸው፣ መናገር ግን አይችሉም፤ ዓይን አላቸው፣ ማየት ግን አይችሉም፤ ⁶ጆሮ አላቸው፣ መስማት ግን አይችሉም፤ አፍንጫ አላቸው፣ ማሽተት ግን አይችሉም፤ ⁷እጅ አላቸው፣ መዳሰስ ግን አይችሉም፤ እግር አላቸው፣ መራመድ ግን አይችሉም፤ ከጕሮሯቸውም ድምፅ አይወጣም። ⁸የሚሠሯቸው እንደ እነርሱ ይሆናሉ፤ በእነርሱ የሚታመን ሁሉ ደግሞ እንዲሁ ነው።

⁹እስራኤል ሆይ፣ በአባታችን ታመን! እርሱ ረዳታቸውና ጋሻቸው ነው። ¹⁰የአሮን ቤት ሆይ፣ በአባታችን ታመን! እርሱ ረዳታቸውና ጋሻቸው ነው። ¹¹አባታችንን የምትፈሩ ሆይ፣ በእርሱ ታመኑ! እርሱ ረዳታቸውና ጋሻቸው ነው።

¹²አባታችን አሰበን፤ ይባርከናል። የእስራኤልን ቤት ይባርካል፤ የአሮንን ቤት ይባርካል፤ ¹³አባታችንን የሚፈሩትን፣ ታናናሾቹንም ታላላቆቹንም ይባርካል።

¹⁴አባታችን እናንተንም ልጆቻችሁንም አብልጦ ያብዛችሁ። ¹⁵ሰማይንና ምድርን በፈጠረ በአባታችን ትባረኩ።

¹⁶ሰማያት የአባታችን ሰማያት ናቸው፤ ምድርን ግን ለሰው ልጆች ሰጥቷል። ¹⁷ሙታን አባታችንን አያመሰግኑም፤ ወደ ዝምታ የሚወርዱም ሁሉ አያመሰግኑም። ¹⁸እኛ ግን ከዛሬ ጀምሮ እስከ ዘላለም ድረስ አባታችንን እንባርካለን። ሃሌ ሉያ!