Khembu Yenina Yaku
Mu kuvutula ngyandu 'Kweti kenina Nzambi wa bawu?', mukunga wisi tesa. Biteki byenina yi munwa, yi mesu yi matu kaasi kabisadilaku kyosu, amana bana bisi byayidika bisi kituka bakonda moya hanga byawu. Mabuka matatu mazimbudilwa mu kukwikila mwena Tata wetu: Kiseledi, nzu ya Loni, yi boosu bana bisi mubanga.
115 1Keku kwena betu, A Tata wetu, keku kwena betu, kaasi hana khembu kwena khumbu yaku, kikuma kya lungongu lwaku lwa bulunda yi kwikama dyaku.
2Mukuma khi makanda masi zimbula: «Kweti kenina buthwena Nzambi wa bawu?» 3Tata wetu kenina muna mazilu; yandi kisi hanga kyosu kina kisi musephidisa. 4Biteki bya bawu byenina phalata yi wolu, muhangu wa moku ma batu. 5Byenina yi munwa, kaasi byafwaniku kuzonza; byenina yi mesu, kaasi byafwaniku kumona; 6byenina yi matu, kaasi byafwaniku kuyuka; byenina yi mambombo, kaasi byafwaniku kuyukila tsudi; 7byenina yi moku, kaasi byafwaniku kusimba; byenina yi malu, kaasi byafwaniku kukangala; amana ka ndinga ku yisi lubuka mu madinga ma bawu. 8Bana bisi byayidika bakituka hanga byawu, abwabuna phi kosu mutu wuna wisi kwikila mwena byawu.
9Kiseledi, kwikilenu mwena Tata wetu! Yandi kenina nsadisi wa bawu yi kibalaka kya bawu. 10Nzu ya Loni, kwikilenu mwena Tata wetu! Yandi kenina nsadisi wa bawu yi kibalaka kya bawu. 11Benu bana bisi banga Tata wetu, kwikilenu mwena yandi! Yandi kenina nsadisi wa bawu yi kibalaka kya bawu.
12Tata wetu wáyubuka betu; yandi kátusakumuna. Kasakumuna nzu ya Kiseledi; kasakumuna nzu ya Loni; 13kasakumuna bana bisi banga Tata wetu, babana ba ha tsi yi babana ba mbuta.
14Tata wetu kalúvudisa benu hika yi hika, benu yi bana benu. 15Lusakumunu kwena Tata wetu, wuna wáhanga zilu yi tsi.
16Mazilu menina mazilu ma Tata wetu, kaasi tsi, wápheka kwena bana ba batu. 17Bafwa bazatulaku Tata wetu, keti bana boosu bisi tuluka mu talala. 18Kaasi betu, tukásakumuna Tata wetu tuka buthwena yi mu mvula yi mvula. Aleluya!
