Zaburi 115

115 ¹ Si kwetu sisi, Baba yetu, si kwetu sisi, bali kwa jina lako uutukuze, kwa sababu ya upendo wako wa agano na uaminifu wako.

² Mbona mataifa waseme, "Yuko wapi sasa Mungu wao?" ³ Baba yetu yuko mbinguni; hufanya lolote apendalo. ⁴ Sanamu zao ni fedha na dhahabu, kazi ya mikono ya wanadamu. ⁵ Zina vinywa, lakini haziwezi kusema; zina macho, lakini haziwezi kuona; ⁶ zina masikio, lakini haziwezi kusikia; zina pua, lakini haziwezi kunusa; ⁷ zina mikono, lakini haziwezi kupapasa; zina miguu, lakini haziwezi kutembea; wala sauti haitoki kooni mwao. ⁸ Wale wazitengenezao huwa kama hizo, na kila mtu anayezitumaini pia.

⁹ Ee Israeli, mtumaini Baba yetu! Yeye ndiye msaada wao na ngao yao. ¹⁰ Enyi nyumba ya Haruni, mtumaini Baba yetu! Yeye ndiye msaada wao na ngao yao. ¹¹ Enyi mnaomcha Baba yetu, mtumaini yeye! Yeye ndiye msaada wao na ngao yao.

¹² Baba yetu ametukumbuka; atatubariki sisi. Ataibariki nyumba ya Israeli; ataibariki nyumba ya Haruni; ¹³ atawabariki wanaomcha Baba yetu, wadogo kwa wakubwa.

¹⁴ Baba yetu na awaongeze zaidi na zaidi, ninyi na watoto wenu. ¹⁵ Mbarikiwe na Baba yetu, aliyeziumba mbingu na nchi.

¹⁶ Mbingu ni mbingu za Baba yetu, bali nchi amewapa wanadamu. ¹⁷ Wafu hawamsifu Baba yetu, wala wote washukao kwenye kimya. ¹⁸ Bali sisi tutambariki Baba yetu tangu sasa na hata milele. Haleluya!