Zaburi 114

114 ¹ Israeli alipotoka Misri, nyumba ya Yakobo kutoka kwa watu wa lugha ngeni, ² Yuda likawa patakatifu pa Baba yetu, Israeli ukawa ufalme wake.

³ Bahari iliona, ikakimbia; Yordani ikarudi nyuma. ⁴ Milima iliruka-ruka kama kondoo dume, vilima kama wana-kondoo.

⁵ Una nini, ee bahari, hata ukakimbia? Una nini, ee Yordani, hata ukarudi nyuma? ⁶ Mna nini, enyi milima, hata mkaruka-ruka kama kondoo dume? Nanyi vilima, kama wana-kondoo?

⁷ Tetemeka, ee nchi, mbele za uso wa Baba Mwenyezi, mbele za uso wa Baba yetu wa Yakobo, ⁸ aliyeugeuza mwamba kuwa ziwa la maji, jiwe gumu kuwa chemchemi itiririkayo.