Toroornatet ko Punjin Inyee
Kowolei taunet ne le “Mi ano Kamuktaindennywa?”, kergeei tyendani. Tinyei kanamonik kutusweek, koonyek ak itiik che ma yaei kiy age tugul, ak che yaei icheek koek uu chooto che ma tinyei saboondo. Kiileenji pororyosyek somok komang'u Kwandanyo kosiir: Israel, kap Aron, ak che iywei ineendet tugul.
115 1Ma acheek, Kwandanyo, ma acheek, ago igoochi kaineng'ung' toroornatet, amu rireeneng'ung' ak imandang'ung'.
2Amu nee si koleen pororyosyek, “Mi ano nguno Kamuktaindennywa?” 3Mi Kwandanyo kipsengwet; yaei kiy age tugul ne machei. 4Kanamonikwak ko fedha ak thahabu, poisyetap eunegap piik. 5Tinyei kutusweek, ago ma muuchi kong'alaal; koonyek, ago ma muuchi koger; 6Tinyei itiik, ago ma muuchi kogas; serunik, ago ma muuchi kong'ucha; 7Tinyei eunek, ago ma muuchi kosapsap; keelyek, ago ma muuchi kowendi; ak ma punu rotweet eng' muriindonywa. 8Koek uu chooto che yaei chooto, ak uu nooto age tugul ne mang'u chooto.
9Israel, imang'u Kwandanyo! Ineendet ko toretennywa ak long'eetennywa. 10Kap Aron, imang'u Kwandanyo! Ineendet ko toretennywa ak long'eetennywa. 11Okweek che oiywei Kwandanyo, omang'u ineendet! Ineendet ko toretennywa ak long'eetennywa.
12Kaibwaatech Kwandanyo; koberuurech. Koberuur kap Israel; koberuur kap Aron; 13Koberuur icheek che iywei Kwandanyo, che mengeechen ak che oo tuwai.
14Ingotesakwok Kwandanyo kogeny, okweek ak chililikwok. 15Ingoberuurok Kwandanyo, ne ki toi kipsengwet ak ng'wony.
16Kipsengwet ko kipsengwet po Kwandanyo, ago ng'wony ko kagoochi piik. 17Ma lasuni Kwandanyo che kagobek, ama lasuni age tugul che choorgei silem. 18Ago kilasu Kwandanyo koyoon nguno ak agoi koigeny. Haleluya!