ਜ਼ਬੂਰ 116

116 ¹ ਮੈਂ ਆਪਣੇ ਪਿਤਾ ਨਾਲ ਪ੍ਰੇਮ ਕਰਦਾ ਹਾਂ, ਕਿਉਂਕਿ ਉਹ ਮੇਰੀ ਅਵਾਜ਼ ਸੁਣਦਾ ਹੈ, ਮੇਰੀਆਂ ਦਯਾ ਲਈ ਪੁਕਾਰਾਂ। ² ਕਿਉਂਕਿ ਉਸ ਨੇ ਆਪਣਾ ਕੰਨ ਮੇਰੇ ਵੱਲ ਕੀਤਾ, ਇਸ ਲਈ ਮੈਂ ਜਦ ਤਕ ਜੀਉਂਦਾ ਰਹਾਂਗਾ ਉਸ ਨੂੰ ਪੁਕਾਰਾਂਗਾ। ³ ਮੌਤ ਦੀਆਂ ਰੱਸੀਆਂ ਨੇ ਮੈਨੂੰ ਵਲ਼ ਲਿਆ; ਕਬਰ ਦੀ ਪੀੜ ਨੇ ਮੈਨੂੰ ਜਕੜ ਲਿਆ; ਮੈਂ ਨਿਢਾਲ ਹੋ ਗਿਆ ਦੁੱਖ ਤੇ ਸੋਗ ਨਾਲ। ⁴ ਤਦ ਮੈਂ ਆਪਣੇ ਪਿਤਾ ਦੇ ਨਾਮ ਨੂੰ ਪੁਕਾਰਿਆ: “ਹੇ ਮੇਰੇ ਪਿਤਾ, ਮੈਂ ਤੇਰੇ ਅੱਗੇ ਬੇਨਤੀ ਕਰਦਾ ਹਾਂ, ਮੇਰੀ ਜਾਨ ਨੂੰ ਬਚਾ!” ⁵ ਸਾਡਾ ਪਿਤਾ ਕਿਰਪਾਲੂ ਤੇ ਧਰਮੀ ਹੈ; ਸਾਡਾ ਪਿਤਾ ਤਰਸ ਨਾਲ ਭਰਪੂਰ ਹੈ। ⁶ ਮੇਰਾ ਪਿਤਾ ਭੋਲੇ-ਭਾਲੇ ਲੋਕਾਂ ਦੀ ਰਾਖੀ ਕਰਦਾ ਹੈ; ਜਦੋਂ ਮੈਂ ਨੀਵਾਂ ਪੈ ਗਿਆ, ਤਾਂ ਉਸ ਨੇ ਮੈਨੂੰ ਬਚਾਇਆ। ⁷ ਹੇ ਮੇਰੀ ਜਾਨ, ਮੁੜ ਆ, ਆਪਣੇ ਅਰਾਮ ਵੱਲ, ਕਿਉਂਕਿ ਮੇਰੇ ਪਿਤਾ ਨੇ ਤੇਰੇ ਨਾਲ ਬੜੀ ਭਲਿਆਈ ਕੀਤੀ ਹੈ। ⁸ ਕਿਉਂਕਿ ਤੂੰ ਮੇਰੀ ਜਾਨ ਨੂੰ ਮੌਤ ਤੋਂ ਬਚਾਇਆ ਹੈ, ਮੇਰੀਆਂ ਅੱਖਾਂ ਨੂੰ ਹੰਝੂਆਂ ਤੋਂ, ਮੇਰੇ ਪੈਰਾਂ ਨੂੰ ਠੋਕਰ ਤੋਂ। ⁹ ਮੈਂ ਜੀਉਂਦਿਆਂ ਦੇ ਦੇਸ ਵਿੱਚ ਆਪਣੇ ਪਿਤਾ ਦੀ ਹਜ਼ੂਰੀ ਵਿੱਚ ਚੱਲਾਂਗਾ। ¹⁰ ਮੈਂ ਵਿਸ਼ਵਾਸ ਕੀਤਾ, ਭਾਵੇਂ ਮੈਂ ਆਖਿਆ, “ਮੈਂ ਬਹੁਤ ਦੁੱਖੀ ਹਾਂ”; ¹¹ ਆਪਣੀ ਘਬਰਾਹਟ ਵਿੱਚ ਮੈਂ ਆਖਿਆ, “ਹਰ ਕੋਈ ਝੂਠਾ ਹੈ।” ¹² ਮੈਂ ਆਪਣੇ ਪਿਤਾ ਨੂੰ ਉਸ ਦੀ ਸਾਰੀ ਭਲਿਆਈ ਦੇ ਬਦਲੇ, ਜੋ ਉਸ ਨੇ ਮੇਰੇ ਨਾਲ ਕੀਤੀ, ਕੀ ਮੋੜ ਕੇ ਦੇ ਸਕਦਾ ਹਾਂ? ¹³ ਮੈਂ ਮੁਕਤੀ ਦਾ ਪਿਆਲਾ ਚੁੱਕਾਂਗਾ ਅਤੇ ਆਪਣੇ ਪਿਤਾ ਦੇ ਨਾਮ ਨੂੰ ਪੁਕਾਰਾਂਗਾ। ¹⁴ ਮੈਂ ਆਪਣੀਆਂ ਸੁੱਖਣਾਂ ਆਪਣੇ ਪਿਤਾ ਲਈ ਉਸ ਦੇ ਸਾਰੇ ਲੋਕਾਂ ਦੇ ਸਾਹਮਣੇ ਪੂਰੀਆਂ ਕਰਾਂਗਾ। ¹⁵ ਮੇਰੇ ਪਿਤਾ ਦੀ ਨਿਗਾਹ ਵਿੱਚ ਉਸ ਦੇ ਭਗਤਾਂ ਦੀ ਮੌਤ ਅਣਮੋਲ ਹੈ। ¹⁶ ਹੇ ਮੇਰੇ ਪਿਤਾ, ਮੈਂ ਸੱਚਮੁੱਚ ਤੇਰਾ ਦਾਸ ਹਾਂ; ਮੈਂ ਤੇਰਾ ਦਾਸ ਹਾਂ, ਤੇਰੀ ਦਾਸੀ ਦਾ ਪੁੱਤਰ। ਤੂੰ ਮੇਰੇ ਬੰਧਨ ਖੋਲ੍ਹ ਦਿੱਤੇ ਹਨ। ¹⁷ ਮੈਂ ਤੇਰੇ ਅੱਗੇ ਧੰਨਵਾਦ ਦਾ ਬਲੀਦਾਨ ਚੜ੍ਹਾਵਾਂਗਾ ਅਤੇ ਆਪਣੇ ਪਿਤਾ ਦੇ ਨਾਮ ਨੂੰ ਪੁਕਾਰਾਂਗਾ। ¹⁸ ਮੈਂ ਆਪਣੀਆਂ ਸੁੱਖਣਾਂ ਆਪਣੇ ਪਿਤਾ ਲਈ ਉਸ ਦੇ ਸਾਰੇ ਲੋਕਾਂ ਦੇ ਸਾਹਮਣੇ ਪੂਰੀਆਂ ਕਰਾਂਗਾ, ¹⁹ ਮੇਰੇ ਪਿਤਾ ਦੇ ਘਰ ਦੇ ਵਿਹੜਿਆਂ ਵਿੱਚ, ਤੇਰੇ ਵਿਚਕਾਰ, ਹੇ ਯਰੂਸ਼ਲਮ। ਹਲਲੂਯਾਹ!