Ɔde Nʼaso Tiee Me
Obi a ofii owu mu bae aseda ma ne Agya. Owu ahama kyekyeree no denneennen, nanso ɔfrɛe no na wotiee no, enti osi gyinae sɛ ɔbɛkɔ so afrɛ no bere dodow a ɔte ase. Obisa nea ɔbɛtumi de atua ka, na obua sɛ ɔbɛma kuruwa so na watua ne bɔhyɛ wɔ baguam.
116 1Medɔ mʼAgya, efisɛ ɔte me nne, me mmɔborɔsrɛ. 2Esiane sɛ ɔde nʼaso tiee me nti, mɛfrɛ no bere dodow a mete ase. 3Owu ahama kyekyeree me ho; ada mu ahoyeraw sɔɔ me mu; ɛhaw ne awerɛhow dii me so. 4Afei mefrɛɛ mʼAgya din se, “Ao mʼAgya, mesrɛ wo, gye me kra!” 5Yɛn Agya yɛ ɔdomfo ne ɔtreneeni; yɛn Agya ahyɛ mmɔborɔhunu ma. 6MʼAgya bɔ ntetekwaafo ho ban; bere a mebrɛɛ ase no, ɔgyee me nkwa. 7San, me kra, kɔ wo home mu, efisɛ mʼAgya ayɛ wo papa yiye. 8Efisɛ woagye me kra afi owu mu, mʼani afi nisu mu, me nan afi hintiw mu. 9Mɛnantew mʼAgya anim wɔ ateasefo asase so. 10Megyee diii, bere mpo a mekae se, “Mahu amane bebree”; 11me ehu mu mekae se, “Nnipa nyinaa yɛ atorofo.” 12Dɛn na metumi de ama mʼAgya wɔ papa a wayɛ ama me nyinaa ho? 13Mɛma nkwagye kuruwa no so na mafrɛ mʼAgya din. 14Mɛdi me bɔhyɛ a mahyɛ mʼAgya no so wɔ ne nkurɔfo nyinaa anim. 15Ne nokwafo wu som bo yiye wɔ mʼAgya ani so. 16Ao mʼAgya, ampa ara meyɛ wo somfo; meyɛ wo somfo, wʼafenaa ba. Woayi me nkɔnsɔnkɔnsɔn. 17Mɛbɔ aseda afɔre ama wo na mafrɛ mʼAgya din. 18Mɛdi me bɔhyɛ a mahyɛ mʼAgya no so wɔ ne nkurɔfo nyinaa anim, 19wɔ mʼAgya fi adiwo mu, wɔ wo mfimfini, Yerusalem. Haleluya!
