Mufundi Katelama
Kwena mutwadisi wa kizamba. Wa Tavidi. Mukunga.
Mutu wafundwa wisi vutula ni singu dya lawu yi dya ngolu kwena wuna wámufuta lungongu lwandi ni kimbeni — wunkaka kabonga kisalu kyandi, bana bandi bakala konda tata. Buna wisi yambula dyadi: meni yenina phutu yi wa mupfunu; yambula basinga, kaasi Tata wama kasakumuna.
109 1A Tata wa lukumu lwama, wudingalalaku, 2Mukuma batu ba mbi yi ba bukamvi bázimbula munwa mya bawu ha thandu yama; bisi kunzonzila ni ndimi za luvunu. 3Ni mambu ma kimbeni bisi kunzyeta, amana bisi kunwanisa konda kikuma. 4Mu vutula lungongu lwama bisi kumfunda, kaasi meni yisi kudihana mu kulombila. 5Bisi kumfuta mbi mu kisidila mboti, yi kimbeni mu kisidila lungongu lwama.
6Heka mutu wa mbi ha thandu yandi; mufundi katelama ku koku dyandi dya kitata. 7Tangwa bakumfúndisa, kalubuka mukwa mukanu; lusambu lwandi lukituka disumu. 8Bilumbu byandi bikala bya ndambu; wunkaka kabonga kisalu kyandi. a a v8 Phetelu wásadila ndinga yayi kwena Yudasi Isikaliote, tangwa batumwa básola Matiya mu kuvutula ha fulu kyandi — Bisalu 1:20. 9Bana bandi bakala konda tata, amana mukhetu wandi kakala mufwidi. 10Bana bandi bazyengila amana balomba bima, babakukwasa mu nzu za bawu zazíluka. 11Mutu wa mfuka kabonga byosu bina kenina byawu; banzenza babotula kibundu kya lombu dyandi. 12Kakala mutu ku wa kusongila buweti kwena yandi, amana kakala mutu ku wa kuyukila kyadi bana bandi bakonda tata. 13Butuka dyandi dizengwa; khumbu ya bawu yikhukumunwa mu mbandu yikwísa. 14Masumu ma batata bandi mayubukwa ku mesu ma Tata wetu, amana disumu dya ngudi wandi dikhukumunwaku. 15Masumu ma bawu makala ku mesu ma Tata wetu mu bilumbu byosu, hanga kakatula kuyubuka kwa bawu mu tsi.
16Mukuma kayubukaku mu kusongila buweti, kaasi wásanda wuna wenina mu phasi yi wuna wenina mu mupfunu yi wa mbundu yabudika, ndangu kabáhonda. 17Wázola masingu; mamvutukila ha thandu yandi. Kámonaku kyesi mu lusakumunu; lukala thama ni yandi. 18Wávwata masingu hanga muledi wandi; makota mu lutu lwandi hanga mamba, hanga masi mu mifufwa myandi. 19Makala hanga muledi wuna kadizingila, hanga mukaba wuna kavwáta mu bilumbu byosu. 20Yayi yikala lufutu lwa bafundi bama lwa kwena Tata wetu, lwa bana bisi kuzonza mambu ma mbi ha thandu ya moya wama.
21Kaasi ngeyi, A Tata Pfumu, mmonisa buweti kikuma kya khumbu yaku; mukuma khenda yaku yenina ya mboti, wumhulula. 22Mukuma yenina mu phasi, yenina mu mupfunu, amana mbundu yama yilwekuki mu kati dya meni. 23Yisi tota hanga kininga kya masika; babankhukumuna hanga mphasu. 24Makungulu mama mazokini kikuma kya kuzila madya; lutu lwama lwayuma amana lwakituka thinu. 25Yikituki kima kya kusevwa kwena bafundi bama; tangwa bisi kummona, bisi kunikisa mutwa mya bawu.
26Wunsadisa, A Tata wama; wumvukisa landila khenda yaku. 27Bazaya ni koku dyaku dyadi, ni ngeyi, Tata wama, wásala dyawu. 28Bawu basinga, kaasi ngeyi kasakúmuna. Tangwa bavumbuka, bakwátuka tsoni, kaasi musadi waku kasepha. 29Bafundi bama bavwata kulewuka; badizinga mu tsoni ya bawu hanga mu muzaka.
30Muna munwa wama yikavútudila Tata wetu matondu mambuta; hana kati dya mulumba-lumba wa batu yikamúkumisa. 31Mukuma wisi telama ku koku dya kitata dya mutu wuna wenina mu phasi, hanga kamuhulula kwena bana bisi zengila moya wandi ndola.
