Laa 109

109 ¹O iwui masotwui Avā, kasaikha mapamalu, ²kaja makhayā kala mikhanam khamorna iwuitungli tonghaira; athumna kakapik male eina iwuitungli matuiya. ³Yangkakharing tui eina athumna ili kuinama, kala maram maleila ili ngaponhaira. ⁴Iwui leikashiwui vang athumna ili khayon phena; kha ina I khalatta seihā kasāli chitheira. ⁵Kaphāwui vang athumna ili makaphā hanmi, kala iwui leikashiwui vang yangkakharing hanmi.

⁶Awuitungli makhayā mi akha kapangmilu; khayon phākazata akha awui yashongli nganingranu. ⁷Ali bichar sā tharan, ali yonngasakranu; awui seihā kasāla morei ngasakranu. ⁸Awui zimiksho kateo ngasakranu; khangatei akhana awui otpam khuiranu. ^a a v8 Chihovābingna Judasli khalatmi khavai Matthiasli kapangkhui tharan, Peterna hi laa tui chi Judas Iscariotwuitungli sāda hānga — Acts 1:20. ⁹Awui naongarā avāva̱ makhalei ngasāranu, kala awui preiva̱ ra̱meinao ngasāranu. ¹⁰Awui naongarā yaozatta lumkakā phāranu; athumwui sākathānmi kahai shimwui eina kashamranu. ¹¹Awui khalei saikora kachishuta mina tukkhuiranu; kha̱mibingna awui yāngwui athei sākazamranu. ¹²Awuili lukhamashan chithei khavai khipānakha maleiranu, kala awui avāva̱ makhalei naongarāli lumashanmi khavai khipānakha maleiranu. ¹³Awui ara̱-azā katathaoranu; khama thotli athumwui ming sāshimitmiranu. ¹⁴Awui shāvā ngarāwui khayonkhamāng chi ithumwui Avāwui mangāli phaningungranu, kala awui ava̱va̱wui morei masāshimithaoranu. ¹⁵Athumwui morei chi ithumwui Avāwui mangāli thangkachida leiranu, chithākha ana okathuiwui eina athumwui ningphun sāshimitmiranu.

¹⁶Kaja ana lukhamashan chithei khavai maphaningungmana, kha athumli shaothat khavai, kachāma, khavāta, kala ning kathengbingli kharomkhuihaira. ¹⁷Ana khonkashili leishilāka; chi awuitungli latungranu. Ana sokhamili maringphāmana; chi awui eina tāthuiranu. ¹⁸Ana khonkashi chi awui kachon thāda ngavaikhui; tara̱ thāda awui phasāli, kala thao thāda awui ara̱kuili kāranu. ¹⁹Chi awui khalatta ngavai kachon thāda, kala thangkachida neikahai shānneira̱ thāda ngasāranu. ²⁰Hi ithumwui Avā eina, imanglāli makhayā hāngbing, iwui kaphenabingwui sāman ngasāranu.

²¹Kha O Proho Avā, namingwui vang eina ili mathālak eina sāmilu; nawui makhangachei leikashi kaphā chiwui vang, ili kanshokmilu. ²²Kaja I kachāma kala khavātana, kala iwui wuklung iningli khamā za̱hai. ²³Ngazinwui khaya̱ thāda I ngahuihaowa; khaoh thāda ili kathantāhaira. ²⁴Kakhumwui vang iwui khuk yāng makakā ngasāsai; iwui phasā thenghaida rurārsār ngasāsai. ²⁵Iwui kaphenabingli mana̱shi khavai I ngasāhaira; ili kathei tharan, athumna kui khanuka.

²⁶Ili khangachonmilu, O iwui Avā; nawui makhangachei leikashi athishurda ili huimilu. ²⁷O iwui Avā, hi nawui pāngna, kala hi nana sākahaina da athumna theiranu. ²⁸Athumna khonshiranu, kha nana somira. Athum ngakarthui tharan khayakra, kha narao ringphāra. ²⁹Iwui kaphenabing maikashina ngavairanu; kala athumwui khayā chi kachon thāda athum khalatta ngavaikhuiranu.

³⁰Iwui khamorna ithumwui Avāli ningkashi haklāk michingra; yarui ngachaili ina ali sochikatra. ³¹Kaja awui manglāli khayon mibing chiwui eina ali huimi khavai, ana khavātawui yāpāngli nganinga.