Thaburi 109 FHB Father's Heart Bible™

109 ¹Wee Ithe wa ũgooci wakwa, ndũgakire, ²nĩgũkorwo tũnua twa waganu na twa maheeni nĩtwahingũkire tũkĩnjũkĩrĩra; nĩmaaragia ũhoro wa kũnjũkĩrĩra na nĩmĩ cia maheeni. ³Na ciugo cia rũmena nĩmathiũrũrũkĩirie, na makanjũkĩrĩra hatarĩ gĩtũmi. ⁴Handũ ha wendo wakwa nĩmanjitangaga, no niĩ ndĩĩheanaga mahooyainĩ. ⁵Nĩmandĩhaga ũũru handũ ha wega, na rũmena handũ ha wendo wakwa.

⁶Mũigĩre mũndũ mwaganu amũũkĩrĩre; naake mũthitangi arũgame mwena wake wa ũrĩo. ⁷Rĩrĩa agaaciirithio, nĩoime arĩ na ihĩtia; namo mahooya make matuĩke mehia. ⁸Matukũ make maronyiiha; naguo wĩra wake ũnyiitwo nĩ mũndũ ũngĩ. ^a a v8 Petero nĩaahũthĩrire rĩandĩko rĩĩrĩ harĩ Judasi Isikariota rĩrĩa atũmwo maathuurire Mathia nĩguo oe handũ hake — Atũmwo 1:20. ⁹Ciana ciake irotuĩka itarĩ na ithe, nake mũtumia wake atuĩke ndigwa. ¹⁰Ciana ciake irorũũra ikĩhooyaga, ikĩingatwo kuuma mĩciĩinĩ yao ĩrĩa ĩanangĩku. ¹¹Mũndũ ũrĩa amũheete thiirĩ arotunyana indo ciake ciothe; nao ageeni matahe maciaro ma wĩra wake. ¹²Gũtikagĩe mũndũ ũngĩmũtugĩra wega, o na gũtikagĩe wa kũiguĩra ciana ciake itarĩ na ithe tha. ¹³Njiaro ciake iroeherio biũ; narĩo rĩĩtwa rĩao rĩthario rũciaroinĩ rũrĩa rũgooka. ¹⁴Ihĩtia rĩa maithe make rĩroririkanwo mbere ya Ithe witũ, narĩo rĩĩhia rĩa nyina rĩtikanathario. ¹⁵Mehia mao marotũũra marĩ mbere ya Ithe witũ hĩndĩ ciothe, nĩguo aniine kĩririkano kĩao gĩthire gũkũ thĩ.

¹⁶Nĩgũkorwo ndaaririkanire gũtuga andũ, no nĩaathingatire mũthĩĩni na mũbatari na ũrĩa ũrĩ na ngoro thuthĩku, nĩguo amoorage. ¹⁷Nĩeendete kũruma andũ; kĩrumi kĩrocookerera igũrũ rĩake. Ndaigana gũkenera kĩrathimo; kĩrotũũra kũraaya nake. ¹⁸Nĩĩhumbĩte kĩrumi taarĩ nguo yake; kĩrotoonya mwĩrĩinĩ wake ta maaĩ, na gũtoonya mahĩndĩinĩ make ta maguta. ¹⁹Kĩrotuĩka ta nguo ĩrĩa ehumbaga, ta mũcibi ũrĩa eohaga hĩndĩ ciothe. ²⁰Rĩĩrĩ nĩrĩo rĩtuĩke irĩhi rĩa athitangi akwa kuuma kũrĩ Ithe witũ, o acio maaragia ũũru wa kũnjũkĩrĩra ngoro yakwa.

²¹No wee, Wee Ithe witũ Mwathani, njĩĩkĩra maũndũ mega nĩ ũndũ wa rĩĩtwa rĩaku; tondũ ũtugi waku nĩ mwega, ndeithũre. ²²Nĩgũkorwo niĩ ndĩ mũthĩĩni na mũbatari, nayo ngoro yakwa ĩgurarĩtio thĩinĩ wakwa. ²³Niĩ nĩngũthira ta kĩĩruru hwaĩinĩ; njĩĩrũrũrio ta ngigĩ. ²⁴Maru makwa nĩmoorĩte hinya nĩ ũndũ wa kwĩĩima irio; naguo mwĩrĩ wakwa nĩũhĩnjĩte ũgathĩĩna. ²⁵Nduĩkĩte kĩndũ gĩa kũnyararwo nĩ athitangi akwa; rĩrĩa maanyoona, nĩmainainagia mĩtwe yao.

²⁶Ndeithia, Wee Ithe wakwa; honokia kũringana na ũtugi waku. ²⁷Nĩmamenye atĩ ũyũ nĩ guoko gwaku, atĩ nĩwe, Wee Ithe wakwa, wĩkĩte ũndũ ũyũ. ²⁸Nĩmarume, no wee nĩũkũrathima. Rĩrĩa makaarahũka nĩmagaaconorithio, no ndungata yaku nĩĩgaakena. ²⁹Athitangi akwa marohumbwo thoni; marwĩhumbe njono ciao taarĩ nguo.

³⁰Na kanua gakwa nĩngũcookeria Ithe witũ ngaatho nyingĩ; gatagatĩinĩ ka kĩrĩndĩ nĩngũmũgooca. ³¹Nĩgũkorwo arũgamaga mwena wa ũrĩo wa mũbatari, nĩguo amũhonokie kuuma kũrĩ arĩa matuagĩra ngoro yake ciira.