Mbaime Nyakupambizira
Kwa nyakutsogolera nyimbo. Ya Dhavidhi. Nyimbo.
Mamuna anapumbirwa anatawira na ntemberero ya ukali yakulapha kwa ule adabweza ufuni wace na kuwenga — munthu munango atenge basa lace, ana ace akhale ansiye. Buluka penepo iye apisiya: ine ndine nyakutcerenga na nyakusowa; atemberere, mbwenye Baba wanga andikombere.
109 1Imwe Baba wa kusimba kwanga, lekani kukhala dete, 2thangwi milomo yakuipa na yakunyengeza yafunguka toera kutsutsana na ine; iwo asalonga kuipa kwanga na malirimi akunama. 3Na mafala akuida iwo asandizungulira, mbandimenya mwakukhonda thangwi. 4M'mbuto mwa kufuna kwanga iwo asandipambizira, mbwenye ine ndisapereka ekha ku maphembero. 5Iwo asandibwezera pyakuipa m'mbuto mwa pyadidi, na kuida m'mbuto mwa kufuna kwanga.
6Sankhulani munthu wakuipa toera kuntsutsa; mbaime nyakupambizira ku nkono wace wamadyo. 7Angatongwa, mbabuluke na mulando; phembero yace mbikhale madawo. 8Ntsiku zace mbzikhale zakucepa; unango mbatambire basa yace. a a v8 Pedhru aphatisira vesi iyi kuna Djuda Isikariyoti mu ndzidzi udasankhula apostolo Matiya toera kupita m'mbuto mwace — Mabasa 1:20. 9Ana ace mbakhale akusowa baba, na nkazi wace mbakhale nzice. 10Ana ace mbazungira-zungira mbaphemba, mbathamangiswa kubuluka m'nyumba zawo zakugwa. 11Nyakukwerekesa mbakwate pyonsene piri na iye; alendo mbapange misapo ya nyatwa yace. 12Mbapakhonde khala munthu wakuncitira kukoma ntima, nee munthu wakubvera ntsisi ana ace akusowa baba. 13Dzindza yace mbigwanditswe; dzina yawo mbifudzwe mu ubalwa unatowera. 14Mulando wa ababa wace mbukumbukwe pamaso pa Baba wathu, na madawo a mai wace mbakhonde kufudzwa. 15Madawo awo mbakhale pamaso pa Baba wathu ndzidzi onsene, toera Iye afudze cikumbuso cawo pa dziko yapantsi.
16Thangwi iye nkhabe kukumbuka kucita kukoma ntima, mbwenye athukuza anyakusauka na anyakutcherenga na anyakuswa ntima, toera kuapha. 17Iye akhafuna matemberero; mbaabwererere kwa iye. Iye nkhabe kukomerwa na nkhombo; mbikhale kutali na iye. 18Iye abvala matemberero ninga nguwo yace; mbaapite mu manungo mwace ninga madzi, ninga mafuta m'magogodo mwace. 19Mbakhale ninga nguwo yakuti iye asamanikira pa manungo, ninga nkaba unaumanga ndzidzi onsene. 20Pyenepi mbipikhale malipo a anyakundipambizira wakubuluka kwa Baba wathu, a ale analonga pyakuipa kuna moyo wanga.
21Mbwenye Imwe, Baba Wankulu, ndicitireni mwadidi thangwi ya dzina yanu; thangwi ntsisi zanu zikulu ndi zadidi, ndipulumuseni. 22Thangwi ine ndiri wakusauka na wakutcherenga, na ntima wanga waswika n'kati mwanga. 23Ine ndisamala ninga ntsidzi wa namaulo; ndisapunguswa ninga dzombe. 24Mabondo anga afewa thangwi ya kujala; manungo anga aonda mbaondeseka. 25Ine ndakhala cinthu cakusingwa kuna anyakundipambizira; angandiona, iwo asasukusa misolo yawo.
26Ndiphedzeni, Imwe Baba wanga; ndipulumuseni mwakubverana na ntsisi zanu zikulu. 27Iwo mbadzindikire kuti uyu ndi nkono wanu, kuti Imwe, Baba wanga, ndimwe mudacita pyenepi. 28Iwo mbatemberere, mbwenye Imwe munadzasimba. Angalimuka iwo anadzapaswa manyadzo, mbwenye ntumiki wanu anadzatsandzaya. 29Anyakundipambizira mbabvazwe manyadzo; mbamanikire manyadzo awo ninga nguwo.
30Na mulomo wanga ndinadzapereka kutenda kukulu kuna Baba wathu; pakati pa mwinji ndinadzan'simba Iye. 31Thangwi Iye asaima ku nkono wamadyo wa nyakutcherenga, toera kumpulumusa kuna ale anatonga moyo wace.
