Ntima Wanga Ndi Wakulimba
Nyimbo. Salmo ya Dhavidhi.
Idasonwa kubuluka mu malombo mawiri akale a Dhavidhi: nyimbo ya macibese inamusa macibese, buluka penepo kudzikuza kwakale kwa Baba wathu kuti Sikemu, Gileyadi na Edhomu ndi pyace. Pakati pawo pana fala yakudekeseka yakuti kupulumusa kwa munthu nkhabe basa, na phembo ya ciphedzo cadidi.
108 1Ntima wanga ndi wakulimba, Baba wanga; ndinaimba mbandalimba nyimbo na moyo wanga onsene. 2Lamukani, imwe arpa na lira! Ine ndinalamusa mamaceo. 3Ndinakusimbani pakati pa madzindza a anthu, Baba wanga; ndinakuimbirani nyimbo pakati pa mitundu. 4Thangwi kufuna kwanu kwa cibverano ndi kukulu, kwakupita padzulu pa kudzulu, na kukhulupirika kwanu kusafika mpaka ku mitambo.
5Kwezwani, Baba wanga, padzulu pa kudzulu, na mbiri yanu mbikhale padzulu pa dziko yonsene. 6Tipulumuseni na djanja yanu yamadyo, mbamunditawira, toera ale munawafuna apulumuswe.
7Baba wathu alonga mu ucena wace kuti: “Mwakukunda, ndinagawa Xekemu mbandapima cigwa ca Sukoti. 8Gileyadi ndi yanga, Manase ndi yanga; Efraimu ndi nkhuwo yanga ya nkhondo, Yuda ndi ndodo yanga ya umambo.
9Moabe ndi mbale yanga yakusambira; pa Edhomu ndinaponya kapatu yanga; pa Filistiya ndinakuwa mwakukunda.”
10Mbani anandikwata mpaka ku nzinda wakuvikirwa? Mbani anandiperekeza mpaka ku Edhomu? 11Kodi nee ndi Imwe, Baba wathu, ule mudatikhonda, mbamukhonda kubuluka pabodzi na mankhondo athu? 12Tiphedzeni toera tilimbane na nyamalwa, thangwi ciphedzo ca anthu ndi capapezi. 13Pabodzi na Baba wathu tinakunda, Iye anaponda anyamalwa athu.
