சங்கீதம் 108

108 ¹ என் இருதயம் உறுதியாயிருக்கிறது, என் பிதாவே; நான் பாடி, என் முழு உள்ளத்தோடும் கீதவாத்தியம் இசைப்பேன். ² வீணையே, சுரமண்டலமே, விழித்தெழுங்கள்! நான் அருணோதயத்தை விழிக்கச்செய்வேன். ³ என் பிதாவே, மக்களுக்குள்ளே உம்மைத் துதிப்பேன்; ஜாதிகளுக்குள்ளே உமக்குக் கீதவாத்தியம் இசைப்பேன். ⁴ ஏனெனில் உம்முடைய உடன்படிக்கை அன்பு பெரிது, வானங்களைவிட உயர்ந்தது, உம்முடைய உண்மை ஆகாயமட்டும் எட்டுகிறது.

⁵ என் பிதாவே, வானங்களுக்கு மேலாக நீர் உயர்ந்திரும், உம்முடைய மகிமை பூமியனைத்தின்மேலும் இருப்பதாக. ⁶ உம்முடைய வலதுகரத்தால் எங்களை இரட்சியும், நீர் நேசிக்கிறவர்கள் விடுவிக்கப்படும்படி எனக்கு மறுஉத்தரவு அருளும்.

⁷ எங்கள் பிதா தம்முடைய பரிசுத்தத்திலே பேசினார்: “வெற்றியோடே நான் சீகேமைப் பங்கிடுவேன், சுக்கோத்தின் பள்ளத்தாக்கை அளந்துகொடுப்பேன்.” ⁸ கீலேயாத் என்னுடையது, மனாசே என்னுடையது; எப்பிராயீம் என் தலைச்சீராயும், யூதா என் செங்கோலாயும் இருக்கிறது.

⁹ மோவாப் நான் கழுவும் பாத்திரம்; ஏதோமின்மேல் என் பாதரட்சையை எறிகிறேன்; பெலிஸ்தியாவின்மேல் வெற்றியோடே ஆர்ப்பரிக்கிறேன்.

¹⁰ அரணிப்பான நகரத்திற்கு என்னை யார் கொண்டுபோவார்? ஏதோம்வரைக்கும் என்னை யார் நடத்திச்செல்வார்? ¹¹ எங்கள் பிதாவே, ஒருகாலத்தில் எங்களைத் தள்ளிவிட்டு, இப்போது எங்கள் சேனைகளோடே புறப்படாதிருக்கிற நீர் அல்லவோ? ¹² சத்துருவுக்கு விரோதமாய் எங்களுக்கு உதவிசெய்யும், ஏனெனில் மனுஷனுடைய இரட்சிப்பு வீணானது. ¹³ எங்கள் பிதாவோடே நாங்கள் வெற்றிபெறுவோம், அவரே எங்கள் சத்துருக்களை மிதித்துப்போடுவார்.