መዝሙር 108

108 ¹አባቴ ሆይ፣ ልቤ ጸንቷል፤ በመላ ማንነቴ እዘምራለሁ፤ ዝማሬ አቀርባለሁ። ²በገናና መሰንቆ ሆይ፣ ንቁ! ንጋትን አነቃለሁ። ³አባቴ ሆይ፣ በሕዝቦች መካከል አመሰግንሃለሁ፤ በአሕዛብም መካከል ዝማሬ አቀርብልሃለሁ። ⁴ምሕረትህ ከሰማያት በላይ ታላቅ ነውና፣ ታማኝነትህም እስከ ደመናት ይደርሳል።

⁵አባቴ ሆይ፣ ከሰማያት በላይ ከፍ ከፍ በል፤ ክብርህም በምድር ሁሉ ላይ ይሁን። ⁶በቀኝ እጅህ አድነን፤ የምትወዳቸውም እንዲድኑ መልስልኝ።

⁷አባታችን በቅድስናው እንዲህ ተናግሯል፦ “በድል አድራጊነት ሴኬምን እከፋፍላለሁ፤ የሱኮትንም ሸለቆ እለካለሁ። ⁸ገለዓድ የእኔ ነው፤ ምናሴ የእኔ ነው፤ ኤፍሬም የራሴ ቍር ነው፤ ይሁዳም በትረ መንግሥቴ ነው።

⁹ሞዓብ የመታጠቢያ ገንዳዬ ነው፤ በኤዶም ላይ ጫማዬን እጥላለሁ፤ በፍልስጥኤም ላይ በድል እጮኻለሁ።”

¹⁰ወደ ተመሸገችው ከተማ የሚያደርሰኝ ማን ነው? ወደ ኤዶምስ የሚመራኝ ማን ነው? ¹¹አባታችን ሆይ፣ የናቅኸን፣ ከሰራዊታችንም ጋራ ከእንግዲህ የማትዘምተው አንተ አይደለህምን? ¹²በጠላት ላይ እርዳታ ስጠን፤ የሰው እርዳታ ከንቱ ነውና። ¹³በአባታችን ድልን እንቀዳጃለን፤ እርሱም ጠላቶቻችንን ይረግጣል።