Saboondo ne Machei Kamuktaindet
Agobo kondaindetap musik. Tyeni ne po utaatyet ne po weeriigap Kora.
Kitilyi hekaluut ak koleenjin kole, “Mi ano Kamuktaindeng'ung'?” Ibwaatei siriindet ole kikondoe tuiyet ne po poiboiyet ne ma koimuuchi koba kogeny. Aeng'o koteebe saboondanyi ne aragen, ak kowolji ko uu niito: mang'u Kwandanyo, amu alasun ineendet kogeny.
42 1Ko uu ye syenei kenyeleet kereruusyegap peek, ko uu nooto syenei saboondanyu inyee, Kwandanyu.
2Machei saboondanyu Kwandanyu, Kwanda ne sabei. Ou ye anyoo ak among'unotgei eng' tainnyi? 3Kigoek peegap konyekyuk amitwogikyuk peet ak kemoi, ye leenjo peetuut komugul kole, “Mi ano Kamuktaindeng'ung'?”
4Abwaati tuguuchu, ye aroong'u saboondanyu: ole aben kobooto tuiyet ak akondoi icheek koba kootap Kwandanyo, kobooto iryagook che po poiboiyet ak songolik che po kalasunet, tuiyet ne oo ne koboiboitu.
5Amu nee si iaragen, saboondanyu, ak amu nee si iwasagei eng' oriitinnyu? Mang'u Kwandanyo; amu alasun ineendet kogeny, yetunennyu ak Kwandanyu.
6Kwandanyu, aragen saboondanyu eng' oriitinnyu; amu nooto abwaati inyee kabun emetap Jordan ak Hermon, kabun tulweetap Misal.
7Kuurei rireet rireet eng' tuleetap peeguk che putei; kamaluuchoon maranosyeguk tugul ak peeguk che somotitogei. 8Peetuut ng'atei Kwandanyo rireenennyi ne po arorutyet, ak kemoi songolyennyi komi anee, saaet ne po Kwandap saboondanyu.
9Aleenji Kwandanyu, rwandennyu, “Amu nee si iutyoon? Amu nee si aben ateiyei amu sastaet ne po puunyoot?” 10Ko uu kaguotenet ne po meet eng' kowekyuk, yaei puunikyuk taunet, ye leenjo peetuut komugul kole, “Mi ano Kamuktaindeng'ung'?”
11Amu nee si iaragen, saboondanyu, ak amu nee si iwasagei eng' oriitinnyu? Mang'u Kwandanyo; amu alasun ineendet kogeny, yetunennyu ak Kwandanyu.