Ra̱changa Manglā
Laa mangāshong zatapawui vang. Corahwui naomayarabingwui thangkhamei laa lairik akha.
Varewui shim eina ngaphai khuihaida, "Nawui Vare kali leikhala?" da ngahānkhami ngākhuida, laa kasā chiya ana ara̱ ngarumrar makhalei ringkaphawui mibing chili ashangva̱ kasā chi phaninga. Awui sifakahai manglāli kani ngahānlaga, kani chithāda ngahāngsanga: ithumwui Avāli chihānlu, ina ali latluida masot chikatra.
42 1Seichui tara̱ kongbingwui vang pantampaira thāda, chitākam eina imanglāna nali pantampaira, iwui Avā.
2Imanglāna iwui Avāli, kharinga Avāli, ra̱changa. Karankha ina awui mangāli rānganingrakhala? 3Ngashun ngayā iwui chāra̱na iwui kashakazā ngasāhaira; langpongda athumna ili hānga, "Nawui Vare kali leikhala?"
4Imanglā heishoklakha, hibing chi ina phaningunga: khamathān khon kala masotlaa eina, mi kachungkha yaruina phāshak phazāda, ina yarui kazip zangda ithumwui Avā shimli athumli mangāshong zata.
5O imanglā, khisāda na sifakhala? Iningli khisāda na chingri makahaikhala? Ithumwui Avāli chihānlu; kaja iwui ngachonkhame kala iwui Avā, ali ina masot chikatluishitra.
6Iwui Avā, iwui manglā iwuklungli sifahaira; chiwui vang eina, Mizar Kaphungwui eina, Jordan kala Harmonwui ngaleiwui eina ina nali phaningunga.
7Nawui tara̱ longshokwui khangashumli kathukana kathukali khangakaona; nawui tara̱ khangaphao kala ngarungning kahai saikora china iwuitungli ngaphaorai. 8Ngashunshong ithumwui Avāna awui makhangachei leikashi kasoi, kala ngayā awui laa, iwui kharingwui Avāli seihā kasā, iwuili lei.
9Ina iwui Avā, iwui lunghārli hānga, "Khisāda nana ili malaihaokhala? Khisāda ina yangkashewui rekakharekwui vang eina sifazatarakhala?" 10Iwui ara̱-arāli kathiwui khamā thāda, iwui yangkashebingna ili mana̱shi; langpongda athumna ili hānga, "Nawui Vare kali leikhala?"
11O imanglā, khisāda na sifakhala? Iningli khisāda na chingri makahaikhala? Ithumwui Avāli chihānlu; kaja iwui ngachonkhame kala iwui Avā, ali ina masot chikatluishitra.
