Umutima unyoterwa
Ku mukuru w’abaririmvyi. Zaburi y’ubukerebutsi y’abana ba Kora.
Ari kure y'urusengero kandi bamutyorera bati 'Imana yawe iri hehe?', umuririmvyi aributse ingene yarongora isinzi ry'abaje ku munsi mukuru, iryo atagishobora kwifatanya na ryo. Incuro zibiri yibaza ku mutima wiwe wacitse intege, akawishura kumwe nyene: wizigire Data wacu, nzosubira kumushemeza.
42 1Nk’uko impongo inyoterwa inzuzi z’amazi, ni ko umutima wanje ukwinyoterwa, Data wanje.
2Umutima wanje unyoterwa Data wanje, Data muzima. Ni ryari nzoshobora kuza ngaragare imbere yiwe? 3Amosozi yanje yabaye ibifungurwa vyanje ku murango no mw’ijoro, mu gihe bambwira umusi wose bati: “Imana yawe iri hehe?”
4Ibi bintu ndavyibuka, mu gihe nsuka umutima wanje: ingene najana n’isinzi, nkabayobora bagenda baja ku nzu ya Data wa twese, bariko basemerera n’umunezero bimbaza indirimbo zo gushemeza, isinzi rinini rinezerewe.
5Ni kuki ucuze bugufi, mutima wanje, kandi ni kuki uhagaritse umutima muri jewe? Izigire Data wa twese; kuko nzosubira kumushemeza, agakiza kanje na Data wanje.
6Data wanje, umutima wanje ucuze bugufi muri jewe; ni co gituma nkwibuka ndi mu gihugu ca Yorodani n’ica Herumoni, ndi ku musozi Mizari.
7Ikibira kirahamagara ikibira ku rwamo rw’isumo zawe; imiraba yawe yose n’amaraba yawe vyandengeyeko. 8Ku murango Data wa twese ategeka urukundo rwiwe rw’isezerano, kandi mw’ijoro indirimbo yiwe iri kumwe nanje, isengesho rija kuri Data w’ubugingo bwanje.
9Mbwira Data wanje, igitandara canje, nti: “Ni kuki wanyibagiye? Ni kuki ngendagenda ndi mu makuba kubera ukunyiganzira kw’umwansi?” 10Nk’igikomere c’urupfu mu magufa yanje, abansha baransuzugura, mu gihe bambwira umusi wose bati: “Imana yawe iri hehe?”
11Ni kuki ucuze bugufi, mutima wanje, kandi ni kuki uhagaritse umutima muri jewe? Izigire Data wa twese; kuko nzosubira kumushemeza, agakiza kanje na Data wanje.
