Moyo Unabva Nyota
Kwa ntsogoleri wa nyimbo. Masalmo a ndzeru a ana a Kora.
Mwakugawika na nyumba ya Mulungu, mbanyozedwa na mafala akuti 'Ali kupi Mulungu wako?', nyakuimba akumbuka pidatsogolera iye mwinji wa phwando, wakuti nkhabe kukwanisa pontho kuphatana nawo. Kawiri abvunza moyo wace wakupsinjika, mbautawira mwakulingana: tsalakana Baba wathu, ndinadzamutenda pontho.
42 1Ninga mbawala inafuna madzi a nkululu, tenepo moyo wanga usakufunani Imwe, Baba wanga.
2Moyo wanga usabva nyota ya Baba wanga, ya Baba wa maso. Ninadza lini toera kuonekera pamaso pace? 3Misozi yanga yakhala cakudya canga masikati na masiku, mukhandipanga iwo ntsiku zonsene kuti: “Mulungu wako ali kupi?”
4Pinthu ipi ndisapikumbuka, mukhathukula ine moyo wanga: kuti ndikhaenda na mwinji wa anthu mbanditsogolera iwo kuenda ku nyumba ya Baba wathu, na kudzamula kwakutsandzaya na nyimbo zakusimba, mwinji ukulu wa anthu mbukhasangalala.
5Thangwi yanji usatsukwala, moyo wanga, pontho thangwi yanji usadzudzumika mukati mwanga? Dikhira kuna Baba wathu; thangwi ndinadzansimba pontho, upulumuki wanga na Baba wanga.
6Baba wanga, moyo wanga usatsukwala mukati mwanga; natenepo ndisakukumbukani Imwe kubulukira ku dziko ya Yordani na ya Herimoni, kubulukira ku phiri ya Mizari.
7Madzi akuzika asacemera madzi akuzika na mkokodyo wa madzi anu akugwa; mabimbi anu onsene na mafunde anu apita padzulu panga. 8Masikati Baba wathu asatonga kufuna kwace kwa cibverano, pontho namasiku nyimbo yace iri na ine, phembero kuna Baba wa umaso wanga.
9Ndisalonga kuna Baba wanga, mwala wanga, kuti: “Thangwi yanji mwandiyebwa Ine? Thangwi yanji ndisafamba-famba mukulira thangwi ya kutcingwa kwa anyamalwa?” 10Ninga cironda cakupha mu magogodo mwanga, anyamalwa anga asandinyoza Ine, mukhandipanga iwo ntsiku zonsene kuti: “Mulungu wako ali kupi?”
11Thangwi yanji usatsukwala, moyo wanga, pontho thangwi yanji usadzudzumika mukati mwanga? Dikhira kuna Baba wathu; thangwi ndinadzansimba pontho, upulumuki wanga na Baba wanga.
