Ule Anaona Anyakutcerenga
Kwa nyakutsogolera nyimbo. Nyimbo ya Dhavidhi.
Mpembo wa pa bedi ya utenda wakutsamira pa cipiciro: Baba wathu asimikisa ule anakumbuka anthu akusowa ciphedzo. Anyakumuzungira asonkhanya mphekesera mbabuluka toera kuimwaza; anyamalwa ace aerengesa kuti anafa lini. Cimeni cakupweteka kakamwe ndi xamwali wakukhulupirika adadya pao pace.
41 1Wakukomerwa ndi ule anasamalira anyakutcerenga; Baba wathu anam'pulumusa pa ntsiku ya nyatwa. 2Baba wathu anan'tsidzikiza na kun'koya maso; iye anacemerwa wakukomerwa n'dziko. Imwe nkhabe kum'pereka iye ku kufuna kwa anyamalwa ace tayu. 3Baba wathu anan'phedza pa kugona kwace mu utenda; mu utenda wace, Imwe munam'wangisa mwakukwana.
4Ine ndalonga tenepa: “Baba wanga, ndibvereni ntsisi; ndiwangiseni, thangwi ndadawa kuna Imwe.” 5Anyamalwa anga asalonga pyakuipa pya ine: “Anafa lini, na dzina yace inafudzika lini?” 6Munthu angabwera kundiona, iye asalonga mafala a pezi, mbwenye muntima mwace asakoya mabodza; penepo asabuluka mbamwaza mabodza eneo.
7Onsene ale anandiida asanong'onezana pabodzi mukundihondera; iwo asandinyerezera pyakuipa. 8“Cinthu cakupha cathiriwa pa iye; iye nkhabe kulamuka pontho pa mbuto inagona iye tayu.” 9Ngakhala xamwali wanga wapantima, ule ndikhan'nyindira, ule adadya nkate wanga, andipandukira. a a v9 Yezu alonga mafala a vesi iyi pa masiku adaperekwa Iye, mbacemera Djuda ninga xamwali ule adadya naye nkate buluka penepo ampandukira (Juwau 13:18).
10Mbwenye Imwe, Baba wanga, ndibvereni ntsisi na kundilamusa, toera ndiwabwezere. 11Na pyenepi ndisadziwa kuti Imwe musakomerwa na ine: kuti nyamalwa wanga nkhabe kukuwa mwakupembera pa ine tayu. 12Ine, Imwe musandiphatirira mu ulungami wanga, na kundiikha pamaso panu kwa muyaya.
13Mbasimbwe Baba wathu, kubulukira kwa muyaya mpaka kwa muyaya. Ameni na Ameni.
