Laa 41

41 ¹Khangazanabingli phaningkhami chi sokhamina; kakhanang atamli ithumwui Avāna ali kanmira. ²Ithumwui Avāna ali yonda kharing eina keimira; ana ngaleili sohaipa da hora. Nana ali awui yangkashebingwui kaphaningli mahorsangmimana. ³Ithumwui Avāna ali awui petli yangmira; awui kazāli nana ali phasākaphā katonga ngasakmira.

⁴Iva, ina hānga, "O iwui Avā, ili lumashanmilu; ili raimilu, kaja ina nawuitungli morei sāhaira." ⁵Iwui yangkashebingna iwui maramli makaphā tui hānga: "Karankha a thida awui ming shimānrakhala?" ⁶Khipākha ili theikhavai rā tharan, ana arema tui hānga, awui wuklungli ana khamashāt tui kazipkhui; chithāda ana shokhailaga khamashāt tui ngayao ngasaka.

⁷Ili yangkakharing saikorana ngarumda iwui maramli akhonnao eina ngazeka; athumna iwui vang zakkashi khangarān sāzata. ⁸"Kathiwui ot akha awuitungli heirorhaira; kapi kahai apam eina ana latluida mangakarthuimara." ⁹Iwui theikakasaiya ngasotnao, ina shitsanga chi einala, iwui kashakazā kazā chi, ili maramli mai ngareithuihaira. ^a a v9 Ali horsangmi arui ngayāli Jishuna laa tui hi hānga, awui kashakazā ngarum zalaga chithāda awui maramli mai ngareithuia ngasotnao chi Judasna da mingmi (John 13:18).

¹⁰Kha nava, O iwui Avā, ina athumli tandi khami khavai, ili lumashanmilu kala ili ngakarthuimilu. ¹¹Nana ili mathāna kaji hi eina ina thei: iwui yangkashena iwuitungli mathānda mavaimana. ¹²Iva, nana ili iwui ningsākhangazip alungli singmira, kala nana ili nawui mangāli katang makhavai sākhuira.

¹³Katang makhavaiwui eina katang makhavai, ithumwui Avāli soranu. Amen, Amen.