Dukhiya ke Sa-Wala Ekjon

Git gabole cholawa manuh karne. David laga ekta bhajan.

Bemar bisna te kora ekta prarthana, ekta vachan uporte bhorsa kori kene: amar Pitri he kun dukhia manuh laga khiyal kore, taike sombhali rakhe. Dikhibole aha manuh khan kotha joma kore aru bahar te jai kene etu phelai dei; dushman khan hisab kore taile kitia mori jabo. Sob pora dukh laga maar to bhorsa thaka bondhu pora he ahise, jun tai laga roti khaise.

Adhyay 41.

Dukhiya ke kun manuh bhabona kore, tai asirbadit ase; digdar laga din te amar Pitri pora tar ke bachabo. Amar Pitri pora tar ke rokhya koribo aru tar ke jinda rakhibo; desh te tai ke asirbadit koi matibo. Apuni tar dushman khan laga itcha te tar ke chari nadibo. Bemar laga bisana te amar Pitri pora tar ke dhori rakhibo; tai laga bemar te Apuni tar ke pura bhal kori dibo.

Moi hoile, moi koise, “Moi laga Pitri, moi ke doya koribi; moi ke bhal kori dibi, kilemane moi Apuni laga birodh te paap korise.” Moi laga dushman khan pora moi laga birodh te biya kotha koi ase: “Tai kitia moribo, aru tar nam kitia harai jabo?” Kunba moi ke sabole ahhile, tai phaltu kotha koi ase, kintu tar mon bhitor te tai bodnam joma kori thake; titia tai bahar te jai kene bodnam prochar kore.

Moi ke ghin kora sob khan eke logote moi laga birodh te lukai koi thake; tarkhan moi karne biya bhabona kore. “Tai uporte ekta mora jinis hali dise; tai jun jagate ghumai ase, ta pora tai aru uthibo naparibo.” Moi biswas kora moi laga usor sathi, kun moi laga roti khaise, tai bhi moi laga birodh te ulti jaise. ^a

Kintu Apuni, moi laga Pitri, moi ke doya koribi aru moi ke uthai dibi, titia hoile moi tarkhan ke badla dibo paribo. Eitu pora moi jani loise Apuni moi uporte khushi ase koi kene: moi laga dushman pora moi uporte jit kori hala-golmali nakore. Moi hoile, Apuni moi laga sapha-mon te moi ke dhori rakhe, aru hodai karne Apuni laga usorte moi ke rakhise.

Amar Pitri ke stuti hobi, ananta pora ananta tak. Amen aru Amen.