Wuna wisi mona mutu wa kukonda kikesa
Kwena mutu wuna wisi twadisa kizamba. Mukunga wa Tavidi.
Lombilu lwa ha thangi ya kimbefu luna lusikidila hana lusilu: Tata wetu kisi syamisa wuna wisi tala mutu wa kukonda kikesa. Banzenza bisi kutikisa misamu amana bisi lubuka mu kuyimwanga; bambeni bisi tanga bwosu kafwana fwa nuni. Mbetulu ya ngolu lawu yenina nduku wa kwikama wuna wádya dipha dyandi.
41 1Kyesi kwena wuna wisi talaka mutu wa kukonda kikesa; Tata wetu kahúlula yandi muna kilumbu kya kiwayi. 2Tata wetu kakeba yandi amana kanánga yandi mu luzingu; bakamutéla mutu wa kyesi mu tsi. Walámbulaku yandi mu luzolu lwa bambeni bandi. 3Tata wetu kasyámisa yandi ha thangi yandi ya kimbefu; muna kimbefu kyandi wakódisa yandi kimakulu.
4Kwena meni, yázimbula: «Tata wama, ngyukila khenda; mbuka, mukuma yásumuka kwena ngeyi.» 5Bambeni bama bisi zonza mambu mambi kikuma kya meni: «Tangwa mbi kafwa, amana khumbu yandi yafwana zíluka?» 6Muna tangwa mutu kakwisa kumbona, kisi zonza ndinga za phamba, bwosu muna mbundu yandi kisi kudika khu; buna wendi kwandi ku mbazi amana kisi mwanga khu yina.
7Boosu bana bisi mbenga bisi zonza ha kimosi mu kitsweki kikuma kya meni; bisi banzila meni mambu mambi. 8«Kima kya lufwa kyatyakani hana yandi; yandi kafwaniku telama hika ha thangi yandi.» 9Ata nduku wama wa bela-bela, wuna yíkwikila, wuna wádya dipha dyama, wátelama kwena meni. a a v9 Yesu wázonzila mambu mama mu phipha yina bámulambula, mu kutela Yuda hanga nduku wuna wádya dipha dyandi amana wátelamina yandi (Yowani 13:18).
10Kaasi ngeyi, Tata wama, ngyukila khenda amana untokamisa, hanga yibafuta. 11Mu dyambu dyadi yisi zaya ni ngeyi wisi sephila mwena meni: mukuma mbeni wama kakalungaku mu ndungunu hana thandu yama. 12Kwena meni, ngeyi wisi unsimba mu masonga mama, amana wántula ku thwala yaku mvula yi mvula.
13Khembu yakala kwena Tata wetu, tuka mu mvula yi mvula tii yi mvula yi mvula. Abwabuna, Abwabuna.
