Ineendet ne Keerei Che Manyinyen
Eng' kondaindetap musik. Tyeng'ap Daudi.
Saaetap tabutap myandanyi ne kitoyoni eng' kayaneet: iriibei Kwandanyo ne iiti che manyinyen. Nyonei toek koyum komosi koba koilde; mwaetae puunik kole konyonit koit meennyi. Ne ya kosiir ko chamyat ne kiyan ne ki am amitwogikyik.
41 1Poiboen chiito ne iiti che manyinyen; isaru Kwandanyo ineendet eng' peetuutap nyalilda. 2Iriibei Kwandanyo ineendet ak koriip kosaboot; kiguure ineendet ne iberuurot eng' emet. Moinde inyee ineendet eng' mugulelwegap puunikyik. 3Tiiei Kwandanyo ineendet eng' tabutap myandanyi; eng' myandanyi iweekyi inyee ineendet kotestai komyee.
4Anee ko, ki ale, “Kwandanyu, irireena; isooba, amu kaayaiywok.” 5Ng'alaali puunikyuk ng'aleek che yaach agobo anee: “Ou meei ineendet, ak kolusyo kainennyi?” 6Ye nyo chiito koger anee, ng'alaali ng'aleek che puch, ye miitei komosi eng' muguleldanyi; yeityo komanda komwa komosi.
7Che wechei anee tugul, ng'alaali eng' mutyo togeennyi agobo anee; chobei yaityet agobo anee. 8“Kiy ne po meet ko kagitumda eng' ineendet; mang'eetu kogeny eng' olooto ne karu.” 9Agot chorwennyu ne kiayan, ne ki am amitwogikyuk, kagowelelgei agobo anee. a a v9 Ki mwa Jeso ng'olyoondani eng' keemutit ne ki ng'wekto ineendet, kogure Judas kole chorweet ne ki yamegei amitwogik kobooto ineendet, yeityo kowelelgei agobo ineendet (Johana 13:18).
10Ago inyee, Kwandanyu, irireena ak ing'eeto, si kobiit arepai icheek. 11Eng' ni anai ale ibaibaitu agobo anee: amu mapoldoi punyondennyu agobo anee. 12Anee ko, itiiei anee eng' imandanyu, ak inde anee eng' taing'ung' koigeny.
13Iberuurot Kwandanyo, kobun koigeny agoi koigeny. Amen ak Amen.