Laa 40

40 ¹Ina ithumwui Avāli ning nganungkhung ngarai; ana ili ngareiungda iwui khavao shāhaira. ²Ana ili khorchopwui eina, leipā kashāwui eina khāngkai; iphei lunghārtungli hai, iwui pheikār lungkhangasakhaira.

³Ithumwui Avāli masotlaa, laa kadhar, ana ikhamorli haimi. Mi kachungkhana theida ngacheera, kala ithumwui Avāli ning horsangra. ⁴Ithumwui Avāli ning horkasang sā mi chi sokhamina; ana langkasobingshong mathuimana, kakapik phāabingshongla mathuimana.

⁵O iwui Avā, nana sākahai matakhak kahai ot kala ithumwui vang nawui kaphaning kachungkhana; nali ngaheokapai khipākha maleimana. Ina chi phongshokta hāng tharan, athum kachungkhana mashānrarmana. ⁶Pha̱kaphayā kala kachigat nana maningchāng, kha nana ikhanā makā ngasakhaira. Rikkatā kachigat kala moreiwui vang kachigat nana mangara. ⁷Chieina ina hānga, "Yanglu, I hi lei, ina rāhaira; lairik akhaluili iwui pongli kapihaida lei."

⁸Ina nawui ningkachāng sākhavai ningchānga, O iwui Avā; nawui ain iwui wuklungli lei. ⁹Ina kazip hakmahālak khamashung khangarongwui paokaphā hāshokhaira; imorchai makafahaimana, O iwui Avā, nana theihaira.

¹⁰Nawui khamashung khangarong iwui wuklungli mathumhaimana; nawui ning katong kala nawui huikhami pongli ina hānghaira. Kazip hakmahālakwui eina nawui makhangachei leikashi kala nawui khamashung tui mafarormihaimana. ¹¹Nawui lukhamashan iwuili masānhaialu, O iwui Avā; nawui makhangachei leikashi kala nawui khamashung tuina ili atam kachida mayonranu.

¹²Kaja shān makhavai kakhanangna ili kuinama; iwui moreina ili rāza̱haira, kala ina mayangrarmana. Athum ikuisamli chungmei, kala iwui ning ili kānhaira. ¹³O iwui Avā, ili kanmilu; O iwui Avā, ili thākta khangachonmilu. ¹⁴Imanglā khuikhavai kasābing saikora khayakta maishi ngasakranu; iwui kashimān ningchāngabing maishida pa̱ngapāra.

¹⁵Ili, "Ahay! Ahay!" da hāngabing, athumwui khalatta maishiwui vang matakhakhaira. ¹⁶Kha nali phāabing saikorana ringphāda nawui lungli mathānranu; nawui huikhamili leishiabing saikorana "Ithumwui Avā reimataikhala!" da atam kachida hāngchingranu. ¹⁷Iva ngazana kala khavātana; Proho Avāna ili phaningra. Na iwui huikhame kala iwui kankhamena; O iwui Avā, masāngmilu.