መዝሙር 40

40 ¹አባታችንን በትዕግሥት ተጠባበቅሁ፤ ወደ እኔ ዞሮ ጩኸቴን ሰማ። ²ከጥፋት ጕድጓድ፣ ከረግረጉ ጭቃ አወጣኝ፤ እግሮቼንም በዐለት ላይ አቆመ፤ አረማመዴንም አጸና።

³በአፌ አዲስ መዝሙር፣ ለአባታችን የምስጋና ዝማሬ አኖረ። ብዙዎች አይተው ይፈራሉ፤ በአባታችንም ይታመናሉ። ⁴አባታችንን መታመኛው የሚያደርግ ሰው ብፁዕ ነው፤ ወደ ትዕቢተኞች የማይዞር፣ ሐሰትን ወደሚከታተሉም የማይመለስ ነው።

⁵አባቴ ሆይ፣ ያደረግሃቸው ድንቅ ሥራዎች፣ ስለ እኛም ያሰብሃቸው ሐሳቦች ብዙ ናቸው፤ የሚስተካከልህ ማንም የለም። ባውጅና ብናገራቸው፣ ከመቈጠር የሚበልጡ ናቸው። ⁶መሥዋዕትና ቍርባን አልፈለግህም፤ ጆሮዬን ግን ከፍተህልኛል። የሚቃጠል መሥዋዕትና የኀጢአት መሥዋዕት አልጠየቅህም። ⁷በዚያን ጊዜ እንዲህ አልሁ፤ “እነሆኝ፣ መጥቻለሁ፤ በመጽሐፉ ጥቅልል ውስጥ ስለ እኔ ተጽፎአል።”

⁸ፈቃድህን ማድረግ እወዳለሁ፣ አባቴ ሆይ፤ ሕግህ በልቤ ውስጥ ነው። ⁹በታላቁ ጉባኤ ውስጥ የጽድቅን ምሥራች ሰብኬአለሁ፤ ከንፈሬን አልዘጋሁም፤ አባቴ ሆይ፣ አንተ ይህን ታውቃለህ።

¹⁰ጽድቅህን በልቤ ውስጥ አልሸሸግሁም፤ ታማኝነትህንና ማዳንህን ተናግሬአለሁ፤ ምሕረትህንና እውነትህን ከታላቁ ጉባኤ አልሰወርሁም። ¹¹ርኅራኄህን ከእኔ አትከልክል፣ አባቴ ሆይ፤ ምሕረትህና እውነትህ ዘወትር ይጠብቁኝ።

¹²ቍጥር የሌላቸው መከራዎች ከብበውኛልና፤ ኀጢአቶቼ ደርሰውብኛል፤ ማየትም አልችልም። ከራሴ ጠጉር ይበልጣሉ፤ ልቤም ዝሎኛል። ¹³እባክህ አባቴ ሆይ፣ አድነኝ፤ አባቴ ሆይ፣ ፈጥነህ እርዳኝ። ¹⁴ነፍሴን ለማጥፋት የሚፈልጉ ሁሉ ያፍሩ፤ ይዋረዱም፤ ጕዳቴን የሚመኙ በውርደት ወደ ኋላ ይመለሱ።

¹⁵ለእኔ፣ “አሃ! አሃ!” የሚሉኝ በገዛ ውርደታቸው ይደንግጡ። ¹⁶አንተን የሚሹ ሁሉ ግን በአንተ ደስ ይበላቸው፤ ሐሤትም ያድርጉ፤ ማዳንህን የሚወዱ ዘወትር፣ “አባታችን ታላቅ ነው!” ይበሉ። ¹⁷እኔ ግን ድኻና ችግረኛ ነኝ፤ ሉዓላዊው አባት ያስበኝ። አንተ ረዳቴና አዳኜ ነህ፤ አባቴ ሆይ፣ አትዘግይ።