Saamu 40

40 ¹Mo fi sùúrù dúró de Baba wa; ó yíjú sí mi, ó sì gbọ́ ẹkún mi. ²Ó gbé mi sókè kúrò nínú ihò ìparun, kúrò nínú ẹrẹ̀ dídì; ó gbé ẹsẹ̀ mi lé orí àpáta, ó mú ìgbésẹ̀ mi dúró ṣinṣin.

³Ó fi orin tuntun sí mi lẹ́nu, orin ìyìn sí Baba wa. Ọ̀pọ̀lọpọ̀ ni yóò rí i, wọn yóò sì bẹ̀rù, wọn yóò sì gbẹ́kẹ̀lé Baba wa. ⁴Ìbùkún ni fún ẹni tí ó fi Baba wa ṣe ìgbẹ́kẹ̀lé rẹ̀, ẹni tí kò yíjú sí àwọn agbéraga, sí àwọn tí ń lépa irọ́.

⁵Ọ̀pọ̀ ni, Baba mi, iṣẹ́ ìyanu tí ìwọ ti ṣe, àti èrò rẹ sí wa; kò sí ẹni tí ó dọ́gba pẹ̀lú rẹ. Bí èmi bá kéde, tí mo sì sọ wọ́n, wọn yóò pọ̀ jù láti kà. ⁶Ẹbọ àti ọrẹ ni ìwọ kò fẹ́, ṣùgbọ́n ìwọ ti ṣí etí mi. Ẹbọ sísun àti ẹbọ ẹ̀ṣẹ̀ ni ìwọ kò bèèrè fún. ⁷Nígbà náà ni mo wí pé, “Èmi nìyí, mo ti wá—nínú àkájọ ìwé ni a ti kọ ọ́ nípa mi.”

⁸Inú mi dùn láti ṣe ìfẹ́ rẹ, Baba mi; òfin rẹ ń bẹ nínú ọkàn mi. ⁹Mo ti kéde ìhìnrere òdodo nínú àjọ ńlá; èmi kò pa ètè mi mọ́, Baba mi, gẹ́gẹ́ bí ìwọ ti mọ̀.

¹⁰Èmi kò fi òdodo rẹ pamọ́ nínú ọkàn mi; mo ti sọ̀rọ̀ nípa òtítọ́ rẹ àti ìgbàlà rẹ. Èmi kò fi ìfẹ́ májẹ̀mú rẹ àti òtítọ́ rẹ pamọ́ kúrò lọ́dọ̀ àjọ ńlá. ¹¹Má ṣe fa àánú oníjẹ̀lẹ́ńkẹ́ rẹ sẹ́yìn kúrò lọ́dọ̀ mi, Baba mi; kí ìfẹ́ májẹ̀mú rẹ àti òtítọ́ rẹ máa pa mí mọ́ nígbà gbogbo.

¹²Nítorí àwọn ìpọ́njú tí kò lóǹkà yí mi ká; ẹ̀ṣẹ̀ mi ti bá mi, èmi kò sì lè ríran. Wọ́n pọ̀ ju irun orí mi lọ, ọkàn mi sì rẹ̀wẹ̀sì. ¹³Jọ̀wọ́, Baba mi, gbà mí; Baba mi, yára wá ràn mí lọ́wọ́. ¹⁴Kí gbogbo àwọn tí ń wá láti gba ẹ̀mí mi ojú kí ó tì wọ́n, kí a sì dójútì wọ́n; kí a lé àwọn tí ń fẹ́ ìparun mi padà nínú ìtìjú.

¹⁵Kí àwọn tí ń wí fún mi pé, “Àhá! Àhá!” kí ìdààmú kí ó bà wọ́n nítorí ìtìjú ara wọn. ¹⁶Ṣùgbọ́n kí gbogbo àwọn tí ń wá ọ yọ̀, kí inú wọn kí ó sì dùn nínú rẹ; kí àwọn tí ó fẹ́ràn ìgbàlà rẹ máa wí nígbà gbogbo pé, “Títóbi ni Baba wa!” ¹⁷Ní tèmi, tálákà àti aláìní ni mí; kí Baba Olódùmarè kí ó ronú nípa mi. Ìwọ ni olùrànlọ́wọ́ mi àti olùgbàlà mi; má ṣe jáfara, Baba mi.