Saamu 39

39 ¹Mo wí pé, “Èmi yóò ṣọ́ ọ̀nà mi kí èmi má ba à fi ahọ́n mi dẹ́ṣẹ̀; èmi yóò fi ìjànu bo ẹnu mi níwọ̀n ìgbà tí àwọn ènìyàn búburú bá yí mi ká.” ²Mo yadi, mo sì dákẹ́; mo dákẹ́ àní nípa àwọn ohun rere, ìrora mi sì burú sí i. ³Ọkàn mi gbóná nínú mi; bí mo ti ń ronú nípa rẹ̀, iná náà jó; nígbà náà ni mo sọ̀rọ̀: ⁴Fi òpin mi hàn mí, Baba mi, àti iye ọjọ́ mi; jẹ́ kí n mọ bí mo ti jẹ́ ẹni ìgbà díẹ̀ tó.

⁵Wò ó, ìwọ ti sọ ọjọ́ mi di ìka ọwọ́ díẹ̀ ní gígùn, ọjọ́ orí mi kò sì jẹ́ nǹkankan lọ́dọ̀ rẹ. Nítòótọ́, èémí lásán ni gbogbo ènìyàn. ⁶Nítòótọ́, bí òjìji ni gbogbo ènìyàn ń rìn kiri; nítòótọ́, lásán ni gbogbo ìyọnu wọn; ó kó ọrọ̀ jọ, kò sì mọ ẹni tí yóò ṣà á jọ. ⁷Àti nísinsìnyí, Baba Olódùmarè, kí ni mo ń dúró dè? Ìrètí mi wà nínú rẹ. ⁸Gbà mí lọ́wọ́ gbogbo ìṣọ̀tẹ̀ mi; má ṣe sọ mí di ẹ̀gàn òmùgọ̀. ⁹Mo yadi; èmi kò ya ẹnu mi, nítorí ìwọ ni ó ti ṣe é. ¹⁰Mú ìyà rẹ kúrò lọ́dọ̀ mi; ìlù ọwọ́ rẹ ti run mí.

¹¹Pẹ̀lú ìbáwí ni ìwọ fi ń bá ènìyàn wí nítorí ẹ̀ṣẹ̀; ìwọ sì ń jẹ ohun tí ó ṣúra fún run bí kòkòrò aṣọ; nítòótọ́, èémí lásán ni gbogbo ènìyàn. ¹²Gbọ́ àdúrà mi, Baba mi, kí o sì fetí sí igbe mi; má ṣe kọ etí sí omijé mi; nítorí àrínrìn-àjò lásán ni mí lọ́dọ̀ rẹ, àlejò bí gbogbo àwọn baba ńlá mi. ¹³Yí ojú rẹ kúrò lọ́dọ̀ mi, kí n lè tún rẹ́rìn-ín músẹ́, kí n tó lọ tí èmi kò sì ní sí mọ́.