Laa 39

39 ¹Ina hānga, "Iwui shongfa ina ngākra, imale eina morei sapaishina; makhayā iwui kuimareida leilakha, ikhamorli khalapa ina yonra." ²I khak ngasha̱da kasaikha pama; kaphā chi pongli ina kasaikha pama, kala iwui khangashei zakshimeihaowa. ³Iwui ning iwuklungli kānghaowa; ina chi phaninglaga, meila chuishoka; chithāda ina hānga: ⁴Iwui khanao ili theingasakmilu, O iwui Avā, kala iwui atambingwui angarit khikhala kaji ili theingasakmilu; I kathāda arema kaji ina theira.

⁵Yanglu, nana iwui atambing khuining kateokha sāhaira, kala iwui mirin nawui mangāli khikhala maningmana. Kachangkhata mi kachiva̱ khaksuikhana. ⁶Kachangkhata mi kachiva̱ khaya̱ thāda zata; kachangkhata athumwui kakhanang saikora aremana; ana lan kaziphaida, kala khipāna kazipra kaji ana matheimana. ⁷Kala ara, O Proho Avā, ina khikha ngaraikhala? Iwui kachihān nali lei. ⁸Iwui khayonkhamāng saikorawui eina ili kanshokmilu; mangkhama̱wui mana̱shi khavai ili masā ngasakalu. ⁹I khak khangasha̱na; ikhamor ina mashokmana, kaja nana china chi sāhaira. ¹⁰Nawui kazā iwui eina khuithuimihaolu; nawui pāngwui kazāna ili yuihaira.

¹¹Morei sāhaiwui vang hāngmachin eina mi akhali nana tandi mi; makung thāda awui kharei lan chi nana shaihaira; kachangkhata mi kachiva̱ khaksuikhana. ¹²Iwui seihā kasā shāmilu, O iwui Avā, kala iwui khavao nganāmilu; iwui chāra̱ mapairekhaialu; kaja I nawui mangāli ramkazata kha̱mi maningla, ishāvā ngarā saikora thāda kha̱mina. ¹³I tāthuida maleiluihaiwui achā, iwui eina namik khuithuimihaolu, chithākha ina latluida ningyāng ungpaira.