Siisetap Daudi eng' Silem
Ne po kiptaiyatap musik, ne po Jedutun. Tyenwogitap Daudi.
Kiyome Daudi koleny ye geerei kiptengeginik, ak koyai silem nyalilda koeet kosiir koit koletuut. Ne letu ko saaet ne le ing'oor Kwandanyi kole ko ng'ering' saboon—kou sendimitaisyek che ng'ering', kou kabuuset—ak koyan mororochik kotomo kobe.
39 1Ki ale, “Ariibe ortinwekyuk si ma ayai tengek eng' ng'elyeptanyu; akonor ratuutyet eng' kutinnyu ye mi kiptengeginik eng' tainnyu.” 2Ki anam kuut ak asiis; asiis agot agobo tuguuk che myee, ak koeet nyalildanyu koya kosiir. 3Ki kolaal muguleldanyu oriitinnyu; ye aibwaate, kobeel maat; yeityo ang'alaal: 4Iboorwo kagesunennyu, Kwandanyu, ak kwaetap peetuusyekyuk; si anai ole matya saboondanyu.
5Ogeero, ki iyai peetuusyekyuk ko ng'ering' kou sendimitaisyek che ng'ering', ak ma kiy age tugul saboondanyu eng' taing'ung'. Imanit, chii age tugul ko kabuuset kityo. 6Imanit, chii age tugul ko pendi kou urwet; imanit, ko kiy ne ma kiy porisennywa tugul; iyumi tuguuk ago ma ng'eng'e ng'oo ne tuun koyum. 7Ak nguno, Kiptaiyat Kwanda, nee ne aigeni? Mang'unennyu ko mi inyee. 8Isarwo eng' pistautikyuk tugul; amakonde anee koek chotisyetap chiito ne abusat. 9Anam kuut; ma ayaate kutinnyu, amu inyee ne kiyai nooto. 10Istoena pareeng'ung' eng' anee; kabeet anee eng' pirisyetap eung'ung'.
11Eng' kergeisyek itigoni chiito agobo tengek; iame kou kuutik konoraikyik; imanit, chii age tugul ko kabuuset kityo. 12Igas saaennyu, Kwandanyu, ak iep iit guuraennyu; ameuny peegap konyekyuk; amu kiprutoiyo kityo anee kobooto inyee, punootyot kou kwanisyekyuk tugul. 13Ung'ei togeng'ung' eng' anee, si abaibaegei kogeny, kotom aba ak amagomi.