Yachiwo Lugeet, Kwandanyu
Netap Daudi.
Ye boryoe ineendet murenik che ki itabaan ak ki lach keriinget agobo icheek ye ki miondos, soomei Daudi Kwandanyi konam long'eet ak ndirit ineegei. Piruteet ne oo ko ye kiweeksei myeeindanyi eng' yaityet ak koboiboiyet ye kingo terter.
35 1Boryoge, Kwandanyu, ak che boryoe anee; boryoge ak che boryoe anee.
2Nam long'eet ak long'eet ne ming'in, ak ing'eet si itoreta. 3Ng'us ng'otit ak ndirit koriikyi che isubi anee; mwochi tamirmiryetanyu ile, “Anee ko yetuneng'ung'.”
4Ingolilan ak kotoptoben che cheeng'ei saboondanyu; ingoweek let ak koinyeeretos che chopchin yaityet anee. 5Ingoek ko uu meteteek eng' taitap koristo, ak koonei malaikatap Kwandanyo icheek. 6Ingoek ooreenywa ko imen ak ko ngelel, ak koosup malaikatap Kwandanyo icheek.
7Amu ki iuunjin regereiywonywa anee, ko ma mi kiit; ki balchin keriinget saboondanyu, ko ma mi kiit. 8Ingobwonji ng'emisyet ne cheein; ingonam regereiywot ne ki iuun ineendet; ingobut ineendet ng'emisyennooto.
9Yeityo koboiboitu tamirmiryetanyu eng' Kwandanyu; koiloskei eng' yetunennyi. 10Komwae kawekyuk tugul ale, “Kwandanyu, ng'oo ne kergei ak inyee, ne isaru pooryeet eng' ne kiimnoten isiir ineendet, pooryeet ak kibanaindet eng' ne choorei ineendet?”
11Kong'eet paorinik che ma po iman; teebei anee agobo tuguuk che ma angen. 12Kogoochin anee yaityet eng' kiy ne myee; kagoek tamirmiryetanyu surkwen. 13Ago anee, ye kingo myandos icheek, ki alaachgei ngoroik che po riyet; ki aiming'inegei eng' karugutetapkei, ak ki weekyigei saaennyu eng' muguleldanyu. a a v13 “Ak ki weekyigei saaennyu eng' muguleldanyu” ko ma nyolu komyee ng'olyoondanyi; imuuchi koboor kole ki po iman saaetap Daudi, ago ma ki kawolji. 14Ki awendaenda ko uu ye ariiree agobo choreetanyu anan tupchennyu; ki aing'ururyegei eng' riyet, ko uu chiito ne riirei kamennyi. 15Ago ye ki apuuni anee, koboiboitu ak koiyumgei; koiyumgei puunik che ki ma angen agaigaige anee, pachei anee ak ma koton. 16Ko uu chotiik che ma po Kamuktaindet eng' sagaet, kong'wanjin anee kelekwak.
17Kiptaiyandennyu Kwandanyu, kou ata ne igeere kityo? Sar tamirmiryetanyu eng' ng'emisyennywa, saboondanyu ne menge eng' ng'etuunyik. 18Amwachinin kongoi eng' tuiyet ne oo; alasunin eng' kwenutap piik che chaang'. 19Mingoboiboitune anee puunikyuk che po lembeenatet, anan che suunei anee ko ma mi kiit kobeles konyekwak. b b v19 Ki inam Jeso ng'olyoondani agobo ineegei — che ki suunei ineendet “ko ma mi kiit” — ko uu suunetap ng'wony ne ki konyolji ineendet eng' ooreet ne kibendi kuruseet (Johana 15:25). 20Amu ma ng'alaali icheek kaalyeet, ago chopchi piik che tala che po emet rwoogik che po lembeenatet. 21Yaatei anee kutusweekwak koo; komwae, “Haa! Haa! Kagogeer konyonyo!”
22Ki igeer inyee, Kwandanyu; matisiis. Kiptaiyandennyu Kwandanyu, mat iloo eng' anee. 23Ing'eetyigei ak iosu, si irwookyi anee, ibesyeiwo ng'aleekyuk, Kiptaiyandennyu Kwandanyu! 24Irwookyin anee, Kwandanyu, ko uu imandang'ung', ak mingoboiboitune anee. 25Mingomwae eng' mugulelwekwak ale, “Haa, niito ne ki kemache!” Mingomwae ale, “Kagilugui ineendet.”
26Ingolilandos ak kotoptobense tuwai pichu che boiboitune agobo nyalildanyu; ingolaakchigei lilan ak teweernat pichu che toroorchinegei agobo anee. 27Ingowaach ak koboiboitu pichu che boiboitune imandanyu; ingomwa peetuusyek tugul kole, “Oo Kwandanyo, ne boiboitune kaalyetap otwogindennyi!”
28Imwaitoi anyun ng'elyeptanyu agobo imandang'ung', agobo lasunetng'ung' peetuut tugul.