Ka Yi Yaƙi Dominana, Ya Ubana

Ta Dawuda.

Mutanen da ya taɓa yi wa azumi ya sa tufafin makoki saboda su sa'ad da suke ciwo suna kai masa hari, Dawuda ya roƙi Ubansa ya ɗauki garkuwa da māshi da kansa. Raunin shi ne cin amana: an rama alherinsa da murnar mugunta da zarar ya yi tuntuɓe.

Babi na 35.

Ka yi faɗa, Ya Ubana, da masu yin faɗa da ni; ka yaƙi waɗanda suke yaƙe ni.

Ka kama garkuwa da ƙaramar garkuwa, ka tashi ka taimake ni. Ka zāre māshi da māshin jifa a kan masu fafarata; ka ce wa raina, “Ni ne cetonka.”

Bari waɗanda suke neman raina su sha kunya, a kuma kunyata su; bari waɗanda suke ƙulla mini mugunta a mai da su baya, a kuma wulakanta su. Bari su zama kamar yayi a gaban iska, mala'ikan Ubanmu yana korarsu. Bari hanyarsu ta zama mai duhu da santsi, mala'ikan Ubanmu yana fafararsu.

Gama ba dalili suka ɓoye ragarsu domina; ba dalili suka tona rami domin raina. Bari hallaka ta auko masa ba labari; bari ragar da ya ɓoye ta kama shi; cikin wannan hallaka bari ya fāɗa.

Sa'an nan raina zai yi farin ciki a cikin Ubana; zai yi murna da cetonsa. Dukan ƙasusuwana za su ce, “Ya Ubana, wa ya yi kama da kai, mai ceton matalauci daga wanda ya fi shi ƙarfi, matalauci da mabukaci daga wanda yake washe shi?”

Shaidu masu mugunta sun tashi; suna tambayata game da abubuwan da ban sani ba. Suna sāka mini mugunta a maimakon alheri; an bar raina a yashe. Amma ni, sa'ad da suke ciwo, na sa tufafin makoki; na ƙasƙantar da kaina da azumi, addu'ata kuwa tana ta komowa cikin zuciyata. ^a Na yi ta zirga-zirga sai ka ce ina baƙin ciki domin abokina ko ɗan'uwana; na sunkuyar da kai cikin makoki, kamar mai kuka domin mahaifiyarsa. Amma sa'ad da na yi tuntuɓe suka yi murna suka taru; masu fāɗa da ban sani ba suka taru su yaƙe ni, suna yāga ni ba fasawa. Kamar masu ba'a marasa tsoron Allah a wurin biki, suka yi mini cizon haƙora.

Ya Ubana Mai Iko Dukka, har yaushe za ka yi kallo? Ka ceci raina daga ɓarnarsu, raina tilo daga zakoki. Zan gode maka a cikin babban taro; a cikin taro mai yawan gaske zan yabe ka. Kada maƙiyana na ha'inci su yi farin ciki a kaina, kada kuma waɗanda suke ƙina ba dalili su ƙyifta ido. ^b Gama ba sa magana ta salama, amma a kan masu nutsuwa na ƙasar suna ƙulla makircin ha'inci. Suna buɗe baki fes a kaina; suna cewa, “Ahā! Ahā! Idanunmu sun gan shi!”

Ka gani, Ya Ubana; kada ka yi shiru. Ya Ubana Mai Iko Dukka, kada ka yi nesa da ni. Ka farka ka kuma tashi domin baratar da ni, domin al'amarina, Ya Ubana Mai Iko Dukka! Ka barata mini, Ya Ubana, bisa ga adalcinka, kada kuma ka bar su su yi farin ciki a kaina. Kada su ce a cikin zuciyarsu, “Ahā, abin da muke so ke nan!” Kada su ce, “Mun haɗiye shi.”

Bari waɗanda suke murna da masifata su sha kunya su kuma wulakantu gaba ɗaya; bari waɗanda suke ɗaga kai a kaina a suturta su da kunya da kaskanci. Bari waɗanda suke farin ciki da baratarwata su yi sowa ta murna su kuma yi farin ciki; bari kullum su riƙa cewa, “Ubanmu mai girma ne, shi da yake farin ciki da zaman lafiyar bawansa!”

Sa'an nan harshena zai yi ta faɗin adalcinka, da yabonka dukan yini.