Nganasook che Kimwechini agobo Che ma Tinyei Tengek
Nganasook che kibunjigei kobooto ortinwek che kagechop, si komwechi chii ne kagoterteer eunnyi aiywet si kobek metit, kosiir lalang angeetap yaaktaindetap mugetuut ak konyoor kirwooget. Kotebi koik che po kiwotet ole ki konde ibinwek che po keny. Ma kinyolji chii eng' kutitap ng'oindet agenge, ak nyooru ng'oindet ne lemeenyot kiit ne ki kobwaatutyini tupchonnyi.
19 1Ye koing'eto Kwandang'ung' pororyosyek che kogoochin landae Kwandang'ung', ak inam si kobunjiin, imeny nganasennywa ak koriinywa, 2itabaanjigei nganasook somok eng' landa ne kogoochin Kwandang'ung' si iname. 3Ichobwo ortinwek ak ipchei kebeberwek somok landa ne kogoochin Kwandang'ung' si iname, si komwechi olooto chii age tugul ne parei chii. 4Nguno ng'olyoondonooto ne po parindet ne mwechi olooto si komeny: ne pirei chiitap kokwennyi amaingen, ma kowechei ineendet eng' tai, 5ko uu ye wendi chiito timiin kobooto chiitap kokwennyi koep keetiik, ak koterteer eunnyi aiywet si kobek keetit, ak kochut irong eng' kaat ak kobar chiitap kokwennyi kome—imuuchi komwechi nganaseet age eng' chuuto ak komeny. 6Si matun koon yaaktaindetap mugetuut, ne lalang angeennyi, parindonooto eng' ooreet ne koi, ak koname, ak kobar, agot ma kinyoljin meet, amu ki ma kowechei chiitap kokwennyi eng' tai. a a v6 Yaaktaindetap mugetuut ko ki tupchennyi ne neegitee ne po chiito ne kabare, ne ki machei pisyet ne po keny kosup parindet; ak nganasook che kimwechini ko ki riipei parindet ne kabar amaingen eng' yaaktindonooto agoi kirwooget ne po imanda. 7Eng' nooto anyun ang'atin: itabaanjigei nganasook somok inyee. 8Ngot kotesin Kwandang'ung' emeng'ung', ko uu ye ki iarorun kwanisyekwak, kogoochin landa tugul ne ki koyomchi icheek. 9Ngot koriip miising' ng'atuutyetap tugul ne agoonin ran—ichame Kwandang'ung' ak iwendi ortinwekyik kotugul—itesyi nganasook somok alak eng' chuuto somok, 10si ma kitumda korotiik che ma tinyei tengek eng' landa ne kogoochin Kwandang'ung' koek poroteet, ak si ma kobut tengektap korotiik eng' inyee. 11Ago ngot kowech chiito chiitap kokwennyi, ak koriibei eng' ung'oot, ak kong'eetyi, ak kobar kome, ak komwechi nganaseet age eng' chuuto, 12isendi poisyegap nganasennyi, ak komut kogeny, ak kogoitoi eung'ap yaaktaindetap mugetuut si kome. 13Amat iriiree; iiste tengektap korotiik che ma tinyei tengek eng' Israel, si komyee inyee.
Riip Kiwotetap Chiitap Kokweng'ung'
14Amat inakta kiwotetap chiitap kokweng'ung', ne ki kiteep piik che po tai, eng' poroteet ne inam eng' landa ne kogoochin Kwandang'ung' si iname.
15Ma imuuchi paorindet agenge kogikyi chii age tugul agobo tengek age tugul anan yaityo age tugul, agobo kiy age tugul ne koyai. Igeskei ng'olyoot eng' paornateetap paorinik aeng' anan somok kityo. 16Ngot konyo paorindet ne mali agobo chii age si kong'ang'u agobo yaityo, 17otononie murenik aeng' che tinyei tiyet eng' taitap Kwandang'ung', eng' taitap tisiik ak kirwoogik che poisyei eng' peetuusyechuun. 18Isyach kirwoogik miising'. Ngot ko paorindet ne lembech, ne baoryan lembech agobo tupchennyi, 19iyachi ineendet ko uu ye ki abwaati koyachi tupchennyi; iiste yaityet eng' kwenung'ung'. 20Kogas che ng'etunotiin ak koywei, ak mata koyai agine yaityet ne uu nooto eng' kwenung'ung'. 21Amat iriiree: saboondo agobo saboondo, konda agobo konda, keldet agobo keldet, euut agobo euut, keeldo agobo keeldo.