Khayon Makhaleibingwui Vang Yāmngayin Khavai Keinungbing
Khamang shimkhur, lamkhoi saphenlaka, chiwuivang kakhane mi aruihon wuishang ngalongsi kaphong kaphok hi zatkhai kathaya kakhanlak eina kaphakharāluiya kala a tuishi mayarlungthei. Ngalei kharilung hi kaphāmli ngasothang kaji zangachang ngasoda ngasuiluiya. Mi kakhane hi kachithei kakhane eina mangasaluiya, kala kachithei kangayana a achiwui achi ali kasāla kachida khale a ali kaji thumluiya.
19 1Nathumwui Avāna nathumli mikahai ngalei kachiwui yurbing chi nathumwui Avāna katattā, kala nathumna athumli kashamshoka, athumwui keinungbing kala shimbingli pamtharan, 2nathumwui Avāna nathumli shimlui sākhavai mikahai ngaleili keinung kathum ngateilu. 3Shongfabing ngarānlu, kala nathumwui Avāna nathumli shimlui sākhavai mikahai ngalei chi kathumda ngayarlu, chithāda mi sakathata china chili yāmngayinpaira. 4Hi mi sakathata chili yāmngayinlaga ringkhavaiwui tuingaphun: kachikathāna matheila awui khongnainaoli shaolaga, rida yangkakharing maleila, 5Kachikathā mina awui khongnainaoli thing katā khavai ngahongli vālaga, thing tahaida awui pāngna ngahā langsotharan, mariwui akui chi thingphāngwui eina langkasolaga awui khongnainaoli shaolaga thihaiakha, chipana keinung hibingwui ngachaili akhali yāmngayinlaga ringpaira. 6Mi sakathata chi rida awui khongnainaoli mangakachaimana, kala a thikhavai khayon maleimana; kha chi maningakha, asheewui athut hāngsangki kajipana malungvātlak, shongfa longa chili ali kharomrāda, ngapaikhuilaga ashaothatra. a a v6 Asheewui athut hāngsangki kajipa chi mi kathikahaiwui achinā katongana, achālakhawui shiyan-chikan athishurda mi sakathatali kharomrā khavai ngashānhaikahaina; yāmngayin keinungbing china matheila mi sathathaipa chili khamashunga bichar makānganingranglakha eina tangda hi athut hāngsang eina khamayonmi. 7Chiwui vang eina ina nathumli ningmi: nakhalattawui vang keinung kathum ngateilu. 8Navā ngarāli khangashit kahai athishurda, nathumwui Avāna nathumwui leiret reisang ngasakda, athumli ngashit kahai ngalei saikora chi nathumli mi tharan, 9Aja zimiksho ina nathumli mikahai ningkhami hi saikora chi nathumna ningsanglak eina ngasharda mayonda, nathumwui Avāli leishida atam kachida awui shongfali zatakha, keinung kathum hibingli keinung kathum mataisanglu, 10chithāda nathumwui Avāna nathumli shimlui sākhavai mikahai ngaleili khayon makhalei ashee matāla, kala asheewui khayon nathumwuitungli marāpaimana. 11Kha kachikathā mina awui khongnainaoli ningkachaida, ngathirai sāda, ali ngararlaga shaolaga thihaiakha, chieina keinung hibingwui ngachaili akhali yāmvālala, 12awui keinungwui khararnaobingna chihovāda, ali khuiungmida, asheewui athut hāngsangki kajipawui pāngli thi khavai mihaora. 13Ali lumashan khavai maleimana; khayon makhalei asheewui khayon chi Israelwui eina tharngasaklu; chithāda nawuili ningyāngkhaung samphangra.
Nakhongnainaowui Thari Khayāshilu
14Achālakhawui thot ngarāna shunkahai nakhongnainaowui thari chi nathumwui Avāna nathumli shimlui sākhavai mikahai ngaleili nathumna samphangki shimluili maphuralu.
15Shākhi akhana kachikathāli morei kala khayon kachiva̱wui vang, khi khanang leilala, hāngkhamachin masārarmana; shākhi khani lah kathumwui hāngkashok eina tangda tuipong chi nganingra. 16Mikhanam shākhi akhana kachikathāwuitungli ali khayon eina phen khavai thuinganingakha, 17reimeithui kaji mikhanina nathumwui Avāwui mangāli, chiwui atamli otram ngatha̱ pāngmonbing kala bichar kasābingwui mangāli nganingra. 18Bichar samebingna meisā eina ngathingkhuiphalungra. Kala shākhi chi minama sāda, achināwuitungli mikhanam shākhi saakha, 19ana achināli sāmira da phaningkasā chi alila sāphalungra; nathumwui alungli makaphā ot chi sāmathāra. 20Chi shālaga khangateibing ngacheera, kala nathumwui ngachaili chikathā makhayā ot khipānakha masāluimara. 21Ali malumashanalu; mirinwui vang mirin, mikwui vang chi mik, hāwui vang chi hā, pāngwui vang chi pāng, pheiwui vang chi phei, chithāda sālu.
