ନିର୍ଦ୍ଦୋଷ ଲୋକଙ୍କ ନିମନ୍ତେ ଆଶ୍ରୟ ନଗର

ପ୍ରସ୍ତୁତ ରାସ୍ତା ସହିତ ଆଶ୍ରୟ ନଗର, ଯେପରି ଯାହାର କୁରାଢ଼ି ମୁଣ୍ଡ ଖସି ଉଡ଼ିଗଲା ସେ ପ୍ରତିଶୋଧକାରୀର କ୍ରୋଧରୁ ଦୌଡ଼ି ବର୍ତ୍ତି ଶୁଣାଣି ପାଇପାରେ। ପୂର୍ବପୁରୁଷମାନେ ସ୍ଥାପନ କରିଥିବା ସୀମା-ପଥର ସେହି ସ୍ଥାନରେ ରହେ। ଜଣେ ସାକ୍ଷୀ ଦ୍ୱାରା କାହାକୁ ଦୋଷୀ କରାଯାଏ ନାହିଁ, ଏବଂ ମିଥ୍ୟା ସାକ୍ଷୀ ନିଜ ଭାଇ ପ୍ରତି ଯାହା କରିବାକୁ ଚାହିଁଥିଲା ତାହା ନିଜେ ପାଏ।

ଅଧ୍ୟାୟ 19।

ଯେଉଁ ଗୋଷ୍ଠୀମାନଙ୍କ ଦେଶ ତୁମ୍ଭ ପିତା ତୁମ୍ଭକୁ ଦେଉଅଛନ୍ତି, ସେମାନଙ୍କୁ ଯେତେବେଳେ ତୁମ୍ଭ ପିତା ଉଚ୍ଛିନ୍ନ କରିବେ, ଆଉ ତୁମ୍ଭେ ସେମାନଙ୍କୁ ତଡ଼ିଦେଇ ସେମାନଙ୍କ ନଗର ଓ ଗୃହରେ ବାସ କରିବ, ସେତେବେଳେ ଅଧିକାର କରିବା ନିମନ୍ତେ ତୁମ୍ଭ ପିତା ତୁମ୍ଭକୁ ଯେଉଁ ଦେଶ ଦେଉଅଛନ୍ତି, ତହିଁ ମଧ୍ୟରେ ତିନିଗୋଟି ନଗର ପୃଥକ୍ କର। ତୁମ୍ଭ ପିତା ତୁମ୍ଭକୁ ଅଧିକାର କରିବା ନିମନ୍ତେ ଯେଉଁ ଦେଶ ଦେଉଅଛନ୍ତି, ତହିଁ ମଧ୍ୟରେ ପଥ ପ୍ରସ୍ତୁତ କରି ତାହାକୁ ତିନି ଭାଗରେ ବିଭକ୍ତ କର, ଯେପରି ଯେକେହି ନରହତ୍ୟା କରେ, ସେ ସେଠାକୁ ପଳାଇ ପାରିବ। ବାସ କରିବା ନିମନ୍ତେ ଯେଉଁ ହତ୍ୟାକାରୀ ସେଠାକୁ ପଳାଇଯାଏ, ତାହାର ବୃତ୍ତାନ୍ତ ଏହି: ଯେ ପୂର୍ବରୁ ଦ୍ଵେଷ ନ ରଖି ଅଜ୍ଞାନରେ ଆପଣା ପ୍ରତିବାସୀକୁ ଆଘାତ କରେ, ଯେପରି କୌଣସି ଲୋକ ଆପଣା ପ୍ରତିବାସୀ ସହିତ କାଠ କାଟିବାକୁ ବଣକୁ ଯାଏ, ଆଉ ବୃକ୍ଷ କାଟିବା ନିମନ୍ତେ ତାହାର ହସ୍ତ କୁରାଢ଼ୀ ଚଳାଇବା ସମୟରେ ଯଦି ଲୁହା ଫାଳ ବେଣ୍ଟରୁ ଖସି ତାହାର ପ୍ରତିବାସୀକୁ ଲାଗେ ଓ ସେ ମରିଯାଏ, ତେବେ ସେ ଏହି ନଗରମାନଙ୍କ ମଧ୍ୟରୁ ଗୋଟିକୁ ପଳାଇ ବଞ୍ଚିବ। ନୋହିଲେ ରକ୍ତର ପ୍ରତିଶୋଧକାରୀ କ୍ରୋଧରେ ଜ୍ଵଳି ହୋଇ ଦୀର୍ଘ ପଥରେ ହତ୍ୟାକାରୀର ପଛେ ଗୋଡ଼ାଇ ତାହାକୁ ଧରି ବଧ କରିପାରେ, ଯଦ୍ୟପି ସେ ପୂର୍ବରୁ ଆପଣା ପ୍ରତିବାସୀକୁ ଦ୍ଵେଷ ନ କରିବାରୁ ପ୍ରାଣଦଣ୍ଡର ଯୋଗ୍ୟ ନ ଥିଲା। ^a ଏଥିପାଇଁ ମୁଁ ତୁମ୍ଭକୁ ଆଜ୍ଞା କରୁଅଛି: ଆପଣା ନିମନ୍ତେ ତିନିଗୋଟି ନଗର ପୃଥକ୍ କର। ଆଉ ତୁମ୍ଭ ପିତା ତୁମ୍ଭ ପିତୃପୁରୁଷମାନଙ୍କ ନିକଟରେ ଯେଉଁ ଶପଥ କରିଥିଲେ, ତଦନୁସାରେ ଯଦି ତୁମ୍ଭର ସୀମା ବଢ଼ାଇ ସେମାନଙ୍କ ନିକଟରେ ପ୍ରତିଜ୍ଞା କରିଥିବା ସମସ୍ତ ଦେଶ ତୁମ୍ଭକୁ ଦିଅନ୍ତି, ଯେଉଁ ଏହିସବୁ ଆଜ୍ଞା ମୁଁ ଆଜି ତୁମ୍ଭକୁ ଦେଉଅଛି, ତାହା ଯଦି ତୁମ୍ଭେ ଯତ୍ନପୂର୍ବକ ପାଳନ କର—ଆପଣା ପିତାଙ୍କୁ ପ୍ରେମ କର ଓ ସର୍ବଦା ତାହାଙ୍କ ପଥରେ ଚାଲ—ତେବେ ଏହି ତିନି ନଗର ସଙ୍ଗେ ଆଉ ତିନିଗୋଟି ନଗର ଯୋଗ କର, ଯେପରି ତୁମ୍ଭ ପିତା ଅଧିକାର ନିମନ୍ତେ ତୁମ୍ଭକୁ ଯେଉଁ ଦେଶ ଦେଉଅଛନ୍ତି, ତହିଁ ମଧ୍ୟରେ ନିର୍ଦ୍ଦୋଷ ରକ୍ତ ପତିତ ନ ହୁଏ ଓ ତୁମ୍ଭ ଉପରେ ରକ୍ତପାତର ଅପରାଧ ନ ବର୍ତ୍ତେ। କିନ୍ତୁ ଯଦି କୌଣସି ଲୋକ ଆପଣା ପ୍ରତିବାସୀକୁ ଦ୍ଵେଷ କରି ଛକି ବସି ତାହା ଉପରେ ଉଠି ଆଘାତ କରି ବଧ କରେ ଓ ତହିଁ ଉତ୍ତାରେ ଏହି ନଗରମାନଙ୍କ ମଧ୍ୟରୁ ଗୋଟିକୁ ପଳାଏ, ତେବେ ତାହାର ନଗରର ପ୍ରାଚୀନବର୍ଗ ଲୋକ ପଠାଇ ତାହାକୁ ସେଠାରୁ ଆଣି ବଧ କରିବା ନିମନ୍ତେ ରକ୍ତର ପ୍ରତିଶୋଧକାରୀ ହସ୍ତରେ ସମର୍ପଣ କରିବେ। ତାହା ପ୍ରତି ଦୟା ନ କର; ଇସ୍ରାଏଲ ମଧ୍ୟରୁ ନିର୍ଦ୍ଦୋଷ ରକ୍ତପାତର ଅପରାଧ ଦୂର କର, ଯେପରି ତୁମ୍ଭର ମଙ୍ଗଳ ହେବ।

ଆପଣା ପ୍ରତିବାସୀର ସୀମାକୁ ସମ୍ମାନ କର

ତୁମ୍ଭ ପିତା ଅଧିକାର କରିବା ନିମନ୍ତେ ତୁମ୍ଭକୁ ଯେଉଁ ଦେଶ ଦେଉଅଛନ୍ତି, ତହିଁ ମଧ୍ୟରେ ଯେଉଁ ଅଧିକାର ତୁମ୍ଭେ ପ୍ରାପ୍ତ ହେବ, ତହିଁରେ ପୂର୍ବକାଳର ଲୋକମାନେ ସ୍ଥାପନ କରିଥିବା ଆପଣା ପ୍ରତିବାସୀର ସୀମାଚିହ୍ନ ଘୁଞ୍ଚାଅ ନାହିଁ।

କୌଣସି ଅପରାଧ ବା ପାପ ବିଷୟରେ, ଯେକୌଣସି ଦୋଷ ହେଉ ନା କାହିଁକି, ଜଣେ ସାକ୍ଷୀ କାହାକୁ ଦୋଷୀ କରିପାରିବ ନାହିଁ। ଦୁଇ କି ତିନି ଜଣ ସାକ୍ଷୀର ପ୍ରମାଣରେ ହିଁ କଥା ସ୍ଥିର ହେବ। ଯଦି କୌଣସି ଅନିଷ୍ଟକାରୀ ସାକ୍ଷୀ କାହା ବିରୁଦ୍ଧରେ ଠିଆ ହୋଇ ତାହା ଉପରେ ଅପରାଧ ଦୋଷ ଲଗାଏ, ତେବେ ଯେଉଁ ଦୁଇ ଜଣଙ୍କ ମଧ୍ୟରେ ବିବାଦ, ସେମାନେ ତୁମ୍ଭ ପିତାଙ୍କ ସମ୍ମୁଖରେ, ସେହି ସମୟର କାର୍ଯ୍ୟରତ ଯାଜକ ଓ ବିଚାରକର୍ତ୍ତାମାନଙ୍କ ସମ୍ମୁଖରେ ଠିଆ ହେବେ। ପୁଣି ବିଚାରକର୍ତ୍ତାମାନେ ଯତ୍ନପୂର୍ବକ ଅନୁସନ୍ଧାନ କରିବେ, ଆଉ ଯଦି ସେହି ସାକ୍ଷୀ ମିଥ୍ୟା ଅଟେ ଓ ଆପଣା ଭ୍ରାତା ବିରୁଦ୍ଧରେ ମିଥ୍ୟା ସାକ୍ଷ୍ୟ ଦେଇଥାଏ, ତେବେ ସେ ଆପଣା ଭ୍ରାତା ପ୍ରତି ଯାହା କରିବାକୁ କଳ୍ପନା କରିଥିଲା, ତାହା ତାହା ପ୍ରତି କର; ଏହିରୂପେ ତୁମ୍ଭ ମଧ୍ୟରୁ ଦୁଷ୍ଟତା ଦୂର କର। ତହିଁରେ ଅବଶିଷ୍ଟ ଲୋକମାନେ ଶୁଣି ଭୀତ ହେବେ, ଆଉ ତୁମ୍ଭ ମଧ୍ୟରେ ଏପରି ଦୁଷ୍ଟ କର୍ମ ଆଉ କେବେ କରିବେ ନାହିଁ। ଦୟା ନ କର: ପ୍ରାଣ ବଦଳେ ପ୍ରାଣ, ଚକ୍ଷୁ ବଦଳେ ଚକ୍ଷୁ, ଦନ୍ତ ବଦଳେ ଦନ୍ତ, ହସ୍ତ ବଦଳେ ହସ୍ତ, ଚରଣ ବଦଳେ ଚରଣ।