Shedbü Akakbü Müt Shuong Shanga Satenshang Sangnyu Shuong
Satetlangbü sangnyu shuong, lam lamleabü yoa, aishanga wou ikei heklep müteibü sii phoklamboueibü ange khulimbo satenan, hoba ngüh ditbo hapla shanga. Boungüh laang shuong kho shaang pisibou shuongei phobü shongko kilabü. Lombou che danko aoeikei shed ajinkulabü, hoba yepeibü lombou cheei hao jaisina to kümla dambü kho hao lolo to kilabü.
19 1Ladang kaibü Bouei haoeneibü kaodak nyi la kubü phang shuong kho shian apan lelaje, hoba nyi haoen kuktienlaje, hoba haoeneibü sangnyu si chem shuonga kilaje, 2kaibü Bouei nyi la phetphanla kubü kaodak ka sangnyu sem pinyinan phoashi. 3Müt haitibou khünei satetlanglabü lele, nyi lam shuong lamleashi, hoba kaibü Bouei nyi la phetphanla kubü kaodak sem la jankushi. 4Habü ho khünei satetlangan kila shanga müt haitiboueibü kümsilei ki: aoei shaangla jembü lepbou amangsen, shanshedte hao haitibou kho, 5Youche, müt cheei jembü lepbou yoa bu wapbula yam to haulaje, hoba haoeibü ikei bu üpla shanga wou jungan hekei, hoba wou nam kaangnyu ka sunglanga jembü lepbou to ngümbo haitilaje—hao habü sangnyu che to satetlangan kilabü. 6Khei aying longa sii phoklambouei aeibou angeko müt haitibou lam yongbü danko shijung hauan laphetlaje, hoba hao haitilaje; aieilausi hao haila amukei, aishanga shaangla haoei jembü lepbou amangsen. a a v6 Sii phoklambou kho haitibü müteibü aeibou nyangbü chempen kikei, hoba shangiedbü song tegü haoei müt haitibou shijung hauda; lausikei satenshang sangnyu shuongei mashikan haitibou kho tükde matjem alo shongko habü phoklambü ka püetkei. 7Khoei ngei nyi la sakkuda: nyi lela shanga sangnyu sem pinyinan phoashi. 8Ladang kaibü Bouei, kaibü pisibousi shuong to theyolanyoko laubü tegü, kaibü leilang yaangngaitilaje, hoba haoen la thekubü kaodak pendou nyi la kulaje— 9Ladang nyi tat ngei nyi la sakkubü ho ngühkhüm pendou maangsangko jungeilaje—kaibü Bou sanoula hoba haoeibü lamnyua ponpen pailaje—kheijinei habü sem thükto sangnyu sem aei jinkushi, 10khei kaibü Bouei nyi la phetphan kula kubü kaodak ka shedbü akakbü sii angtila shanga, hoba nyi thükto sii angbü shedbü asungbalabü. 11Lausikei müt atei jembü lepbou mangsenan, thamtham thoan, hao khulimbo meimeian ngümbo haitilaje, kheijinei habü sangnyu che to satetlanglaje, 12haoeibü sangnyu leiyeibü jaishou shuongei hautian hao leishaian, hao haitila shanga sii phoklambou ik to kulabü. 13Nyi hao to ngüha alejan; shedbü akakbü sii angbü shedbü Israel ka apbushi, khei nyi la maibü kilabü.
Jembü Lepboueibü Leilang to Soumo Hatashi
14Kaibü Bouei nyi la phetphanla kubü kaodak ka, nyi phetphanbü phejana, shaangla meten shuongei thanan phobü jembü lepboueibü leilang nyi khokan apjan.
15Aukabü cheei müt che to shedbü ayingsi shabü ai ongkei, ai shedbü shonkei, hao yukti athükkei. Ngüh che kho müt nyi ayingsi sem aukabü shuongeibü ngühlang ong thon letilabü. 16Ladang ngühmaang alanbü aukabü cheei müt che khulimbo hao to shedbü attila shanga thedangto loulaje, 17lemen kibü müt haosi kaibü Bou thedanga, kho chaloua khangenbü ungshedbou shuong hoba matjembü shuong thedanga loan kilabü. 18Matjembü shuongei maisho lamenjan. Hoba aukabü bou kho amlangbü, haoeibü jaisina khulimbo amlangbü aukabü tütalonga, 19haoei haoeibü jaisina to jungeila dambü tegü, hao to jungeiashi; kho tegü kanei kan yo ka amaibü apjan. 20Joubü shuongei kho ditlabü hoba hatlabü, hoba kho tegü kümsilei amaibü kan yoa ladangkei akümlabü. 21Kaneibü nyekei sanou adamjan: langkei kho langkei jeila, nyek kho nyek jeila, hauh kho hauh jeila, ik kho ik jeila, you kho you jeila.
