Seneibü Bouei Haoeibü Ungshedbou Shuong Shanga Kümenda
Ungshedbou shuongei wanei lembü shaulabü, phetphan aki. Phangshuongeibü chanyu litnyu chühbü, seibüyaübü hoba haibü to joyobü kho pendou teku. Kho phaia seneibü Bouei haoeneibü jaisi yoka Mosa tegü thuseibou che tonenlabü, hoba thuseiboueibü ngüh thonenbü kho hao thekubü ki dogo takteibü ki.
18 1Levi ungshedbou shuong, kho Levi chung pendou, Israel yoa phejan ayingsi phetphanlabü aki; haoenei seneibü Bou to wanei lembü shaulabü, kho haoeibü phetphan ki. 2Haoeneibü jaisinasi shuong yoa haoeneibü phetphanlabü aki; seneibü Bou kho haoeneibü phetphan ki, haoei haoen to thekubü tegü. 3Ho mütli ka ungshedbou shuongeibü janbü ki: masu ayingsi sanlon lembü shuongei ungshedbou to phak, cheei jiji, hoba shimung kujan. 4Kaneibü youshou, ih, hoba onang shaangbü, hoba kaneibü sanloneibü wi shaangbü hao la kujan. 5Aishanga seneibü Bou nyena ponpen pida hoba khangenla shanga, kaneibü Bouei hao hoba haoeibü shousi shuong kaneibü chung pendou ka pienkei.
6Ladang Levibü che hao kishang Israela kaneibü sangnyu che ka satlaje, hoba haoei mangsühbü tegü seneibü Bouei pienlabü kaoen to loulaje, 7kheijinei haoei seneibü Bou thedanga haikei kibü haoeibü jaisinasi Levibü shuong pendou tegü, seneibü Bou nyena khangenla thükkei. 8Jembü chempeneibü nyaksinam yaakbü ka haoei hapbü to limbo, haoei phejan jetei shaulabü.
Bouei Seibüyaübü Kümsilei Lothedada
9Ladang kanei kaneibü Bouei kan la kubü kao to atlaje, khübü phangshuongeibü mangsenlabü kümsilei achühletla teki. 10Kan yoa aoeikei jembü shou bousu ayingsi yaksa shou wana ajuoklabü, seibü akümlabü, tetenbü akümlabü, takbüthapbü akümlabü, ayingsi khüksiuok akümlabü, 11khüksiuok kümbou, sou kibü, soushou yemshanla haubü, ayingsi haibü shuong to pheyoko aikei kan yoa akilabü. 12Aishanga aoei habü thinei kümda haoei seneibü Bou shanga mangsenlabü ki; habü mangsenlabü kümsilei shanga, kaneibü Bouei kan thedang ka haoen shian apda. 13Kanei kaneibü Bou thedanga tükde kijan. 14Habü kanei shian sattienlabü phang shuong kho—haoenei tetenbü hoba seibü shuong to ngüha leda. Kaneibü Bouei kan la ho asakku.
Bouei Thuseibou Che Hautilabü
15Kaneibü Bouei kan la, kan yoka, kaneibü jaisinasi shuong yoka, ngo tegübü thuseibou che phokulabü—hao to ngüha leashi. a a v15 Peter si Stefenei Jisu kho seneibü Bouei phokula thekubü thuseibou dogo nyenkei—hao to Israelbü wekoei ngüha lela janbü ki (Acts 3:22-23; Acts 7:37). 16Ho kho kanei kambü chaloua Horeba kaneibü Bou ka hibü ki: “Ngo seneibü Bou ngüh touje aditlabü, ayingsi ho wan yaangbü touje ahaplabü, khei aying longa ngo ühailabü.”
17Hobaje seneibü Bouei kü to laukei, “Haoenei laubü ngüh kho tükde ki. 18Haoen shanga haoeneibü jaisina yoa nyi tegü thuseibou che ngei longtikulabü; ngei kü ngüh haoeibü sembunga jinkulabü, hoba haoei ngei hao la sakkubü pendou haoen to lenlabü. 19Aoei haoei kü nyena laubü kü ngüh aditlaje, ngei lolo hao ik ka hilabü. 20Lausikei thuseibou aoei kü nyena ngei asakkubü ngüh laula ühütlaje, ayingsi lubü mühghaü nyena laulaje, kho thuseibou tükde haitilabü.”
21Hobaje kanei kaneibü maangpona, “Seneibü Bouei alaulabü ngüh künei lai küman ngela?” dogo laualonga, 22Ladang thuseibou cheei seneibü Bou nyena laulaje hoba kho ngüh aloushadlaje ayingsi ahaüthüklaje, kho ngüh seneibü Bouei alaulabü ki; thuseibouei yongko laukei. Hao to hatko teki.
