Deuteronomy 19 FHB Father's Heart Bible™

19 ¹Jitia tumar Pitri pora, kun desh laga mati tumar Pitri tumi ke di ase, hei desh khan ke khotom kori dibo, aru tumi tarkhan ke khedai di kene tarkhan laga sheher aru ghor khan te thaki jabo, ²tumar Pitri pora tumi ke adhikar koribole diya mati te tinta sheher alag kori rakhibi. ³Rasta khan bonabi, aru tumar Pitri pora tumi ke uttoradhikar hobole diya mati ke tin bhag te bhag koribi, titia kun manuh pora kunba ke morai dibo, tai ta te polai jabo pare. ⁴Eitu ase morai diya manuh laga kotha, jun jinda thakibole ta te polai jabo: jun pora age pora ghin nakori kene, najani kene tar usor manuh ke marise, ⁵jineka ekjon manuh tar usor logot te lakri kati bole jongol te jai, aru ekta gash ke katibole tar hath pora kurhal mare, kintu loha laga mur tu bat pora khuli kene tar usor ke lagi kene morai diye—tene hole tai eitu sheher khan ekta te polai jai kene jinda thakibo pare. ⁶Nahole khoon laga badla lua manuh tu, khong te joli kene, lamba rasta te morai diya manuh ke khedibo, aru taike dhori kene morai dibo, hoilebi tai moribole thik nai, kilemane tai age pora tar usor ke ghin kora nai. ^a a v6 Khoon laga badla lua manuh tu mora manuh laga sob pora usor te thaka ghor-manuh thakise, aru purana niyom hisab te tai morai diya manuh ke khedibole thakise; luki bachibole sheher khan pora bhul pora morai diya manuh ke, ekta thik bisar nohua tak eitu badla pora bachai rakhise. ⁷Etu karne moi tumi ke hukum di ase: tumi nijor karne tinta sheher alag kori rakhibi. ⁸Jodi tumar Pitri pora, Tai tumar purbo-purukh khan ke kosom khaise nisena, tumar simana ke dangor kori dibo, aru Tai tarkhan ke vachan diya sob mati tumi ke dibo. ⁹Jodi tumi aji moi tumi ke diya eitu sob hukum ke bhal pora mani kene—tumar Pitri ke morom koribi aru hodai Tar rasta khan te berabi—tene hole eitu tinta logot te aru tinta sheher milai dibi, ¹⁰titia tumar Pitri pora tumi ke uttoradhikar hisab te diya mati te nirdos khoon nabohibo, aru tumar uporte khoon laga dosh nagiribo. ¹¹Kintu jodi ekjon manuh pora tar usor ke ghin kori kene, luki kene rukhi thakise, aru tai uporte hamla kori kene taike morai dise, titia eitu sheher khan ekta te polai jaise, ¹²tetiya tar sheher laga bura manuh khan pora manuh pathai kene taike wapas anibo, aru taike moribole khoon laga badla lua manuh laga hath te di dibo. ¹³Taike eku morom nadikhabi; Israel pora nirdos khoon laga dosh ke hatai dibi, titia tumi karne bhal hobo.

Tumar usor manuh laga simana ke sonman koribi

¹⁴Tumar Pitri pora tumi ke adhikar koribole diya mati te, tumi pa-a uttoradhikar te, age laga purukh khan pora rakhi diya tumar usor laga simana chihna ke najuwaibi.

¹⁵Ekjon sakhi pora kunba ke eku paap nahole golti karne dosi koribo napare, jiman bhi golti hoilebi. Kotha ekta to duijon nahole tinjon sakhi laga gawahi uporte he khara hobo. ¹⁶Jodi ekjon biya mon laga sakhi pora kunba manuh birodh te taike golti laga dosh dibole age ahhibo, ¹⁷tene hole jhagara te thaka duijon manuh tumar Pitri age te, hei din khan te sewa kori thaka purohit aru bisar-korta khan age te khara hobo lage. ¹⁸Bisar-korta khan pora bhal pora bisar koribo lage. Jodi hei sakhi jhuth ase, aru tar bhai birodh te jhuth gawahi dise, ¹⁹tene hole tai tar bhai karne ki bhabi thakise, hei taike kori dibi; tumar majot pora biya ke hatai dibi. ²⁰Baki manuh khan pora huni kene bhoi koribo, aru tumar majot aru kitia bhi eneka biya kaam nakoribo. ²¹Morom nadikhabi: jivon laga bodli te jivon, suku laga bodli te suku, daat laga bodli te daat, hath laga bodli te hath, bhori laga bodli te bhori.