Thiraang Ongnu Katha
Laa to khangnu takolu lang bi. Korah sa rwan om ningting kalum laa khat.
Bathiangnu riak bina kapaangluga, 'Narikrwang intia ambo?' diga twei ongnu kaan bi, laa tonupana maanna atun kai lat ngam maaknu karonu mi khang ding lampui bi kai dam ngaaknu ding baningsuwe. Kani thaan maanna baom kasao kabaonu katha khou ngaiye, khatle hadanga ni thaanka katake: ani Pa khou bachunno, Maan ding Eina nanao swankalune.
42 1Sajuk na tui lwang ding thiraang danga, Apa, Akatha na Nang ding thiraangnuwe.
2Akatha na Apa ding, ringnu Pa ding thiraangnuwe. Intia Ei hungluga Bameithaan bi indao thang ngam dingbo? 3Lumik le zingpha le Amikthi ga Athaisaak to rwe, banina lumik khangsung Eikhou, “Narikrwang intia ambo?” diga rinpanga.
4Akatha ga buntaluga hei thinu ding Eina baningsuwe: Eina mi khang le diga, karo khwan le swannu laa le bachamga, karonu mi khang puina, ani Pa in bi bani ding lampui bi kai dam ngaake.
5Akatha, pa-aam toga nang phaang batanubo, khatle pa-aam toga Asung bi nang kasao kabaonubo? Ani Pa khou bachunno; balangbe Eina Maan ding nanao swankalune, Maan ga Aom ringriak khatle Apa gaye.
6Apa, Asung bi Akatha phaang batanuwe; atibriakpina Jordan khatle Hermon talei bina, Mizar Rammwan bina, Eina Nang ding baningsuwe.
7Kathuknuna Nom tui lwang baraamna kathuknu ding kouwe; Nom tuipui baraam khatle tui kabaapnu bing ga Ei chung bi phaa danga hung rwe. 8Lumik, ani Pa na Bachongren kriang ding zathang nge, khatle zingpha bi Baom laa ga Ei le diga ong nge, Aringnu Pa khou kalumnu khat gaye.
9Eina Apa, Alung pui khou rinne, “Pa-aam toga Nangna Ei ding banim thangnubo? Munanu na riangre thang ongnu briakpina, pa-aam toga Ei chunto lo siaga koi dam ongnubo?” 10Aru bi thi dingnu liamnu danga, Amaitwang bingna Ei ding chak thang nge, banina lumik khangsung Eikhou, “Narikrwang intia ambo?” diga rinpanga.
11Akatha, pa-aam toga nang phaang batanubo, khatle pa-aam toga Asung bi nang kasao kabaonubo? Ani Pa khou bachunno; balangbe Eina Maan ding nanao swankalune, Maan ga Aom ringriak khatle Apa gaye.