Babylon om tuiqwa bing paam bi chapnu
Babylon om tuiqwa bing pam bi ongnu, man ram bi inkam thangnu nunna bani om tamrwang bing ding khit thang rwe, balangbe bani ding man thang damnu nunna bain khouna karonu laa bathai briakpina. Jerusalem ding baningsu lat mak dingnu bani na chongren towe, khatle laa ga Edom le Babylon khou thao maknu kasianu bina khut rwe, haga tatoga le sum thang laye.
137 1Babylon om tuiqwa bing pam bi, Zion ding ani na baningsunu kaan bi, habei ga ani pi badungluga chap rwe. 2Habei willow kung bing chung bi ani om tamrwang bing ding ani na khit thang rwe. 3Balangbe habei ga ani ding man thang damnu nunna laa bing ani khouna basap rwe, khatle ani ding riangre thang damnu nunna karonu laa lang kou rwe, “Zion om laa bing khat ting ani lang laa to ngo!” diga rinne.
4Man ram bi ani na ani Pa om laa ding tatoga laa to ngam dingbo? 5Eina nang ding baningsu lat make dabe, Jerusalem, akut bazin na baom kutthiam ding baningsu lat ding ngo. 6Eina nang ding baningsu lat make dabe, akaro kataknu chung bi Jerusalem ding basaang lat make dabe, alei ga amun chung bi batai ding ngo.
7Apa, Jerusalem in balum tanu ni Edom rwan ding baningsuwo, banina hadanga rinne, “Rai satro! Rai satro! Baom inmun tangga rai satro!” diga. 8Babylon sa kamaisa, to braan dingnu, nangna ani khou to damnu danga nang khou chwan nung suiga pi thangnu maan ga aih saye! 9Na om kasinnu naosen rwan ding loiluga lung chung bi bwei sat thangnu maan ga aih saye! a a v9 Jisu na ririak senu lang kakounu ding cross la kalwangluga, “Apa, bani ding ngaidat thang ngo,” diga kalum rwe — khatle Baom mi nun khou bani om kazun rwan ding kriang lang swan thang rwe. Kraan bi nam thou damnu mi nun om baze sekka balung pwannu ga, haga han swak ngamnu khatchanu ani Pa khou kalwang thang nge.