Titus hungnu paan bina Bathem Thangnu
Titus na Macedonia la chong kai hungluga, Paul om kazaknu ga karen rwe. Baom balang riangrenu na bani ding sung riangre thang ngaake, khatle maanna haga pi thangnu ding kaba riangre ngaaknu danga ong beida, sung riangrenu na bani ding han thang rwe. Ani Pa na baningnu sung riangrenu na pakhatchale kaba riangre maknu sung hannu la kai nge. Maanna bani ding ei balumsa lat rwe diga thiap thiapka rinne.
7 1Atibriakpina, kriangnu nun ga, hei karen thangnu bing ani khou amga, ani pum khatle katha om bathiang maknu bing khouna ani bahak to bathiang seluga, ani Pa ding kachiga bathiangnu to loi sazo.
2Nani sung bi ani ding badam pi thang ngo. Anina pakhatchale koi maan thangnu make, pakhatchale to braan thangnu make, pakhatchale rou sia thangnu make. 3Eina nani ding pi koi thang lang heiya rinnu make. Toiga eina rin ngaaknu danga, nani ani le diga thinu khatle ringnu lang ani sung bi ongme. 4Nani lang bi ei balumsat lianga amme, nani lang bi lian tonu lianga amme. Ei sum thangnuna sipe, ani riangre kanang bing bi karonuna taswang khak karowe.
5Anina Macedonia hung tangnu kaan bi le, ani pum basak khatchale lou mak ngaake; balang bingza haran thang ngaake, langkaang la maitwang amme, sung bi kachinu amme. 6Atiyeda sung kasonnu bing bathem thangnu ani Pa na, Titus hungnu paan bina ani ding bathem thang rwe. 7Bating hungnu paan bina za makka, nani lang chungna maanna lousunu sum thangnu paan bina le, nani om kadou thangnu, nani sung riangrenu khatle ei lang nani om sung khutnu ding maanna ani khou rin thang rwe; atibriakpina ei inkuga karo lat rwe.
8Aom chamthwanna nani ding sung riangre thang ngaak peida le, eina haga sung le make. Toiga eina sung le ngaak peida, atun haba chamthwanna nani ding bakaan kasemza sung riangre thang rwe dinu eina muwe. 9Atun ei karowe—nani sung riangrenu langna make atiyeda nani sung riangrenuna sung lenu phun hungnu langna karowe. Ani Pa om bathainu nung suiga nani sung riangre thang rwe, atibriakpina ani paan bina nani khatchale braan mak ngaake. 10Balangbe ani Pa om bathainu nung suiga sung riangrenuna, sung le lat maknu, kanthangnu khou nainu sung lenu phun hung nge; atiyeda talei ram om sung riangrenuna thinu phun hung nge. 11Phaang ngo, ani Pa om bathainu nung suiga hei sung riangrenuna nani khou pa-aam pa-aam phun hung thangnu ga: sung khutnu, nani bahak to baze lang nwamnu, sung sounu, kachinu, kadou thangnu, thounu sanu khatle bazenu chongsem lang chamdaannu! Balang bingza bi hei chwan bi nani bahak ding koi maaknu dinu nanina pi batake. 12Eina nani khou hiak thang ngaak peida le, haga koi to damnu mi lang za makka, koi maan thang ongnu mi lang le za makka atiyeda, ani Pa meithaan bi ani lang nani om sung bathiangnu ga nani khou indao thang langna eina hiak tamnu rwe. 13Atibriakpina ani ding bathem thang rwe. Ani om bathem thangnu za makka, Titus om karonu bi anina inkuga karo lat rwe, balangbe nani mi bing paan bina bating katha ga pi lozaang thang rwe. 14Eina maan khou nani lang bi lian tonu ga pa-aam amme, ei ding pi kazak thang make. Anina nani khou rin thangnu bingza bataknu ongnu danga, Titus meithaan bi ani om lian tonu ga le bataknu ding indao thang rwe. 15Nani mi bingna chong zeinu ga khatle kachiga khatle kathokka bating ding lou thangnu ga baningsuluga, nani lang bating sungna inkuga lianga amme. 16Ei karowe, balangbe balang bingza bi nani lang bi tipka balumsat amme.