2 ቆሮንቶስ 7

7 ¹እንግዲህ፣ ወዳጆች ሆይ፤ እነዚህ ተስፋዎች ስላሉን፣ ከሥጋና ከመንፈስ ርኵሰት ሁሉ ራሳችንን እናንጻ፤ አባታችንንም በመፍራት ቅድስናን እንፈጽም።

²በልባችሁ ውስጥ ስፍራ ስጡን። ማንንም አልበደልንም፤ ማንንም አላጠፋንም፤ ማንንም አልበዘበዝንም። ³ይህን የምለው ልፈርድባችሁ አይደለም፤ አስቀድሜ እንዳልሁት፣ አብረን ልንሞትና ልንኖር በልባችን ውስጥ ናችሁ። ⁴በእናንተ ታላቅ እምነት አለኝ፤ በእናንተም እጅግ እኵራራለሁ። በመከራችን ሁሉ መጽናናት ሞልቶብኛል፤ ደስታም ከመጠን በላይ ይፈስብኛል።

⁵ወደ መቄዶንያ በደረስንም ጊዜ እንኳ ሰውነታችን ዕረፍት አላገኘም፤ በየአቅጣጫው ተጨንቀናል፤ ከውጭ ጦርነት፣ ከውስጥ ፍርሀት ነበር። ⁶ነገር ግን የተዋረዱትን የሚያጽናና አባታችን በቲቶ መምጣት አጽናናን። ⁷በመምጣቱ ብቻ ሳይሆን፣ ከእናንተ የተነሣ ባገኘው መጽናናት ደግሞ ነው፤ የናፍቆታችሁን፣ የሐዘናችሁንና ለእኔ ያላችሁን ቅንዓት ነገረን፤ ስለዚህ ይበልጥ ደስ አለኝ።

⁸ደብዳቤዬ ባሳዘናችሁም እንኳ አልጸጸትም፤ ያ ደብዳቤ ለጥቂት ጊዜ ቢሆንም እንዳሳዘናችሁ ስለማይ ተጸጽቼ የነበርሁ ብሆንም እንኳ፤ ⁹አሁን ደስ ይለኛል፤ ስለ ማዘናችሁ አይደለም፣ ሐዘናችሁ ወደ ንስሓ ስላደረሳችሁ ነው እንጂ። አባታችን እንደሚፈልገው አዝናችኋልና በእኛ ምክንያት ምንም አልተጎዳችሁም። ¹⁰አባታችን እንደሚፈልገው የሆነ ሐዘን የማያስጸጽት፣ ወደ ድነት የሚያደርስ ንስሓን ያስገኛል፤ የዓለም ሐዘን ግን ሞትን ያስገኛል። ¹¹እነሆ፣ አባታችን እንደሚፈልገው የሆነው ይህ ሐዘን በእናንተ ዘንድ ምን እንዳስገኘ እዩ፤ ትጋትን፣ ራሳችሁን ለማጽዳት መትጋትን፣ ቍጣን፣ ፍርሀትን፣ ናፍቆትን፣ ቅንዓትን፣ ፍትሕን ለማድረግ መዘጋጀትን አስገኘ! በነገሩ ሁሉ በዚህ ጕዳይ ንጹሓን መሆናችሁን አስመስክራችኋል። ¹²ብጽፍላችሁም እንኳ፣ ስለ በደለኛው ወይም ስለ ተበዳዩ አልነበረም፤ ነገር ግን ለእኛ ያላችሁ ቅንነት በአባታችን ፊት ለእናንተ እንዲገለጥ ነው። ¹³ስለዚህ ተጽናንተናል። ከመጽናናታችንም በላይ፣ መንፈሱ በሁላችሁ ስለ ታደሰ በቲቶ ደስታ ይበልጥ ደስ አለን። ¹⁴ስለ እናንተ በእርሱ ፊት የተመካሁት ሁሉ አላሳፈረኝም። የነገርናችሁ ሁሉ እውነት እንደ ነበረ፣ በቲቶ ፊት የተመካነውም እንዲሁ እውነት ሆኖ ተገኘ። ¹⁵ሁላችሁ እንዴት እንደ ታዘዛችሁ፣ በፍርሀትና በመንቀጥቀጥም እንዴት እንደ ተቀበላችሁት እያሰበ ለእናንተ ያለው ፍቅር ይበልጥ ይጨምራል። ¹⁶በነገር ሁሉ በእናንተ ፍጹም እምነት ስላለኝ ደስ ይለኛል።