Ethuthuzelwa Kukufika kukaTito

UTito ufika eMakedoni ephethe iindaba, loloyiko lukaPawulos luphele. Incwadi yakhe ebuhlungu yayibakhedamisile, waza wakhe wazohlwaya ngokuyithumela, kodwa ukukhedama kwabaguqula. Ukukhedama akuthanda uBawo wethu kuzisa inguquko ekungazohlwaywa ngayo mntu. Uthetha ngokucacileyo ukuba uyabathemba kwakhona.

Isahluko 7.

Ngoko ke, zintanda, sinamadinga la, masizihlambulule kuko konke ukungcola kwenyama noko komoya, sibugqibelela ubungcwele ngokumoyika uBawo wethu.

Yenzani indawo yethu ezintliziyweni zenu. Asonanga mntu, asonakalisanga mntu, asixhaphazanga mntu. Anditsho oku ukuze ndinigwebe. Nditshilo ngaphambili ukuthi: nisezintliziyweni zethu, ukufa nokudla ubomi kunye. Ndinenkoloseko enkulu kuni, ndiqhayisa kakhulu ngani. Ndizele yintuthuzelo, ndiphuphuma luvuyo kuyo yonke imbandezelo yethu.

Nasekufikeni kwethu kwelaseMakedoni, imizimba yethu yayingenakuphumla—sixhaphazwa ngeenxa zonke, iingxabano ngaphandle, uloyiko ngaphakathi. Kodwa uBawo wethu, othuthuzela abakhedamileyo, wasithuthuzela ekufikeni kukaTito. Kungekuphela ekufikeni kwakhe, kodwa nangentuthuzelo awayifumanayo ngenxa yenu—wasixelela ngokulangazelela kwenu, nangokukhedama kwenu, nangenzondelelo yenu ngam—ndaza ndaba nemihlali nangakumbi.

Nangona incwadi yam yanikhedamisa, andizohlwayi ngayo—nangona ndandizohlwaya, kuba ndibona ukuba loo ncwadi yanikhedamisa, nokuba kwaba sithutyana nje. Ngoku ndiyavuya—hayi kuba nakhedamiswa, kodwa kuba ukukhedama kwenu kwazisa inguquko. Nakhedamiswa ngokokuthanda kukaBawo wethu, ngoko akubangakho nto nilahlekelwa yiyo ngathi. Kuba ukukhedama okungokokuthanda kukaBawo wethu kuzisa inguquko esindisweni, ngaphandle kokuzohlwaya; kodwa ukukhedama kwehlabathi kuzisa ukufa. Yabonani into eyaveliswa kuni koku kukhedama okungokokuthanda kukaBawo wethu: inkuthalo, nenzondelelo yokuzithethelela, nomsindo, noloyiko, nokulangazelela, nenzondelelo, nokukulungela ubulungisa! Kuyo yonke into nazibonakalisa ningenatyala kulo mcimbi. Nangona ndanibhalela, kwakungengenxa yalowo wonileyo, nokuba yalowo wonelweyo, kodwa kuko ukuze ukunyaniseka kwenu kuthi kubonakale kuni phambi koBawo wethu. Kungenxa yoko ke sathuthuzeleka. Ngaphezu kwentuthuzelo yethu, saba nemihlali nangakumbi ngovuyo lukaTito, ngokuba umoya wakhe wahlaziywa nini nonke. Konke endaqhayisa ngako kuye ngani akundihlazisanga. Njengokuba yonke into esanixelelayo yayiyinyaniso, ngokunjalo nokuqhayisa kwethu phambi kukaTito kwaba yinyaniso. Intliziyo yakhe ngani ikhulu ngakumbi, akukhumbula ukuva kwenu nonke, namkele yena ngokoyika nangokungcangcazela. Ndiyavuya, kuba kuyo yonke into ndinenkoloseko egqibeleleyo kuni.