പിതാവിന്റെ വാൾ ഫെലിസ്ത്യയുടെമേൽ പതിക്കുന്നു
നമ്മുടെ പിതാവിന്റെ പ്രളയം വടക്കുനിന്ന് ഫെലിസ്ത്യയുടെമേൽ പൊങ്ങുന്നു; പിതാക്കന്മാർ മക്കൾക്കായി തിരിഞ്ഞുനോക്കാത്തത്ര പെട്ടെന്ന്. ഗസ്സയും അസ്കലോനും വിലപിക്കുന്നു. വിശ്രമിക്കാൻ ഇനി എത്രനാൾ എന്ന് വാളിനോടു ചോദിക്കുന്നതോടെയും, കല്പന ശേഷിക്കുന്നിടത്തോളം ഇല്ല എന്ന മറുപടിയോടെയും അത് അവസാനിക്കുന്നു.
47 1ഫറവോൻ ഗസ്സയെ ആക്രമിക്കുന്നതിനുമുമ്പ്, ഫെലിസ്ത്യരെക്കുറിച്ച് യിരെമ്യാ പ്രവാചകന് നമ്മുടെ പിതാവിന്റെ അരുളപ്പാട്.
2നമ്മുടെ പിതാവ് ഇപ്രകാരം അരുളിച്ചെയ്യുന്നു: “ഇതാ, വടക്കുനിന്ന് വെള്ളം പൊങ്ങി കരകവിഞ്ഞൊഴുകുന്ന പ്രവാഹമായിത്തീരുന്നു. അവ ദേശത്തെയും അതിലുള്ള സകലത്തെയും, നഗരത്തെയും അതിലെ നിവാസികളെയും മുക്കിക്കളയും. ജനം നിലവിളിക്കും, ദേശത്തു വസിക്കുന്ന എല്ലാവരും അലമുറയിടും. 3അവന്റെ കുതിരകളുടെ കുളമ്പടിയൊച്ച കേൾക്കുമ്പോൾ, അവന്റെ രഥങ്ങളുടെ ഇരമ്പലും ചക്രങ്ങളുടെ മുഴക്കവും കേൾക്കുമ്പോൾ, കൈകൾ തളർന്നുതൂങ്ങി പിതാക്കന്മാർ തങ്ങളുടെ മക്കൾക്കായി തിരിഞ്ഞുനോക്കുകയില്ല, 4സകല ഫെലിസ്ത്യരെയും നശിപ്പിക്കാൻ വരുന്ന ദിവസംനിമിത്തം, സഹായിക്കാൻ കഴിയുമായിരുന്ന ഓരോ ശേഷിപ്പിനെയും സോരിൽനിന്നും സീദോനിൽനിന്നും ഛേദിച്ചുകളയാനായിത്തന്നെ. കഫ്തോർ തീരപ്രദേശത്തെ ശേഷിപ്പായ ഫെലിസ്ത്യരെ നമ്മുടെ പിതാവ് നശിപ്പിക്കുകയാകുന്നു. 5ഗസ്സ ദുഃഖത്തിൽ തല മൊട്ടയടിക്കും; അസ്കലോൻ നിശ്ശബ്ദമാക്കപ്പെടും. അവരുടെ താഴ്‌വരയിലെ ശേഷിപ്പേ, എത്രകാലം നീ നിന്നെത്തന്നെ മുറിവേൽപ്പിക്കും? 6അയ്യോ, നമ്മുടെ പിതാവിന്റെ വാളേ! എത്രകാലംകൊണ്ട് നീ വിശ്രമിക്കും? നിന്റെ ഉറയിലേക്കു മടങ്ങുക; അടങ്ങി സ്വസ്ഥമായിരിക്കുക. 7എന്നാൽ നമ്മുടെ പിതാവ് അതിന് കല്പന നല്കിയിരിക്കെ അതിന് എങ്ങനെ വിശ്രമിക്കാൻ കഴിയും? അസ്കലോനും കടൽത്തീരത്തിനും എതിരായി—അവിടേക്കാണ് അവിടുന്ന് അതിനെ നിയോഗിച്ചിരിക്കുന്നത്.”
